अलिबाग (प्रतिनिधी):ॲड.मानसी ताई म्हात्रे यांच्या नेतृत्वाखाली अलिबाग शहर व तालुक्यातील रिक्षाचालक-मालकांनी रेंटल बाईक व्यवसायाविरोधात तीव्र आंदोलन छेडले आहे. रिक्षाचालकांच्या उपजीविकेवर गदा आणणारा हा व्यवसाय तात्काळ थांबवावा, अशी मागणी प्रादेशिक परिवहन विभाग पेण यांच्याकडे निवेदनाद्वारे करण्यात आली.
रिक्षाचालकांचे म्हणणे आहे की, परवानगीशिवाय सुरू झालेल्या या बाईकसेवेने प्रवासी वाहतूक व्यवसायात असमान स्पर्धा निर्माण झाली आहे. रिक्षा हा अनेकांच्या उदरनिर्वाहाचा प्रमुख आधार असून रेंटल बाईकच्या व्यवसायामुळे त्यांचे आर्थिक गणित कोलमडत चालले आहे. त्यामुळे प्रशासनाने याकडे गांभीर्याने लक्ष देऊन तात्काळ कारवाई करावी, अशी मागणी करण्यात आली.
ॲड.मानसी ताई म्हात्रे यांनी सांगितले की, “आमची लढाई ही न्यायासाठी आहे. रिक्षाचालकांचे हक्क आणि रोजगार अबाधित राहावेत, यासाठी आम्ही हा लढा सुरू ठेवणार आहोत.”
“आपली लढाई आपल्याच न्यायासाठी” या घोषवाक्याखाली हे आंदोलन रिक्षाचालकांनी उभारले असून पुढील काळात आंदोलने तीव्र करण्याचा इशारा देण्यात आला आहे.
