माजी सभापती दिलीप भोईर यांच्या नेतृत्वाखाली मोर्चेकरी जिल्हाधिकारी कार्यालयावर एकवटले. यावेळी आदिवासी कातकरी समाज संघटनेचे जिल्हाध्यक्ष भगवान नाईक, जलदीप तांडेल, मुकेश नाईक, धर्मा लोगे, कृष्णा पिंगळा, मोरेश्वर हाडके, गजानन पाटील, रविंद्र वाघमारे, भरत पाटील आदी मान्यवर उपस्थित होते. मोर्चेकऱ्यांनी धनगर व बंजारा समाजाला अनुसूचित जमातीच्या आरक्षणात समाविष्ट करण्याच्या प्रयत्नांना तीव्र विरोध दर्शविला.
मोर्चेकऱ्यांच्या शिष्टमंडळाने निवासी उपजिल्हाधिकारी यांची भेट घेऊन आपली भूमिका स्पष्ट केली. तसेच शासनाला सविस्तर निवेदन सादर करण्यात आले. निवेदनात विद्यमान अनुसूचित जमातींच्या हक्कांवर कुठलाही गदा न येता त्यांचे आरक्षण सुरक्षित ठेवावे, अशी ठाम मागणी करण्यात आली. शासनाने या संदर्भात तातडीने भूमिका स्पष्ट करावी, अन्यथा आंदोलन तीव्र करण्याचा इशारा यावेळी देण्यात आला.
या मोर्चामुळे अलिबाग शहरात वातावरण चांगलेच तापले होते. कोळी व आदिवासी समाजातील बांधवांनी आपले हक्क अबाधित ठेवण्यासाठी एकजूट दाखवली. शासनाने न्याय्य निर्णय न घेतल्यास आगामी काळात मोठे आंदोलन उभे राहील, असा इशारा उपस्थित मान्यवरांनी दिला.
