रायगड (प्रतिनिधी):नवी मुंबई आंतरराष्ट्रीय विमानतळ प्रकल्पाच्या भरती प्रक्रियेत स्थानिक आणि प्रकल्पग्रस्तांना प्राधान्य न दिल्यास विमानतळावरून एकही विमान उडू देणार नाही, असा तीव्र इशारा शेतकरी कामगार पक्षाचे सरचिटणीस तथा आमदार जयंत पाटील यांनी दिला आहे.
नवी मुंबई विमानतळाच्या कामाचा अंतिम टप्पा सुरू असून, लवकरच मोठ्या प्रमाणात भरती प्रक्रियेला सुरुवात होणार आहे. मात्र, या भरतीत स्थानिक तरुणांना आणि प्रकल्पग्रस्तांना न्याय मिळावा, अशी मागणी शेकापकडून सातत्याने करण्यात येत आहे. याच पार्श्वभूमीवर अलिबाग येथे झालेल्या पक्षाच्या महत्त्वपूर्ण बैठकीत या विषयावर सखोल चर्चा करण्यात आली.
पाटील म्हणाले, “ज्या शेतकऱ्यांनी या विमानतळासाठी आपली जमीन दिली, त्यांना रोजगाराचा हक्क आहे. बाहेरून लोक आणून स्थानिकांचा हक्क हिरावून घेतला जाणार नाही. जर शासन आणि संबंधित कंपनीने स्थानिकांना न्याय दिला नाही, तर आम्ही आंदोलनाचा मार्ग स्वीकारू. आवश्यक असेल तर विमानतळाच्या धावपट्टीवरून एकही विमान उडू देणार नाही.”
तसेच, विमानतळाला शेकापचे नेते आणि जननेते दि. बा. पाटील यांचे नाव देण्याचा निर्णय उद्घाटनावेळीच अंमलात आणावा, अशी मागणी त्यांनी ठामपणे मांडली.
या प्रश्नावर मित्र पक्षांना सोबत घेऊन मोठा मोर्चा काढण्याचाही निर्णय बैठकीत घेण्यात आला आहे. “ही केवळ मागणी नाही, तर स्थानिकांच्या न्यायासाठीची लढाई आहे,” असे म्हणत जयंत पाटील यांनी सरकार आणि प्रशासनाला दोन आठवड्यांचा अल्टिमेटम दिला आहे.
हा इशारा आणि भूमिका पाहता, नवी मुंबई विमानतळाच्या भरती प्रक्रियेसंदर्भात आगामी काळात तीव्र आंदोलनाची शक्यता नाकारता येत नाही.
