अलिबाग (प्रतिनिधी): राष्ट्रीय स्वयंसेवक संघ, अलिबाग तालुक्याचा पारंपरिक श्री विजयादशमी उत्सव रविवार, दि. ५ ऑक्टोबर २०२५ रोजी सायं. ४ वाजता मोठ्या उत्साहात संपन्न झाला. हिंदू धर्मातील शौर्य आणि शक्तीचे प्रतीक असलेल्या या मंगल दिवशी संघाची स्थापना झाली असून, यंदा संघ स्थापनेला १०० वर्षे पूर्ण झाली आहेत. या शताब्दी वर्षात उत्सवाला विशेष उत्साह लाभला.
कार्यक्रमाला रायगड जिल्ह्यातील प्रमुख क्षेत्रातील सुप्रसिद्ध व्यावसायिक व सागररत्न संशोधन व संवर्धन संस्थेचे अध्यक्ष मा. श्री. सुधीर दत्तात्रय आग्रावकर प्रमुख अतिथी म्हणून उपस्थित होते. तसेच मा. श्री. शिरंग श्रीनिवास काणे, जिल्हा कार्यवाह, राष्ट्रीय स्वयंसेवक संघ यांनी प्रमुख वक्ता म्हणून मार्गदर्शन केले.
उत्सवाचे आयोजन डॉ. अमेय अरविंद केळकर, तालुका कार्यवाह, राष्ट्रीय स्वयंसेवक संघ अलिबाग यांच्या पुढाकाराने करण्यात आले. या कार्यक्रमात संघाच्या स्वयंसेवकांसह विविध सामाजिक संस्थांचे पदाधिकारी, नागरिक व महिला मोठ्या संख्येने सहभागी झाले.
विजयादशमी निमित्ताने हिंदू समाजातील एकता, संघटन आणि देशसेवेचा संकल्प यावर प्रेरणादायी विचार मांडण्यात आले. प्रमुख वक्त्यांनी संघ कार्याच्या शताब्दी वर्षात समाजातील प्रत्येक घटकाने राष्ट्रहितासाठी एकत्र येण्याचे आवाहन केले.
कार्यक्रमानंतर प्रार्थना व राष्ट्रगीताने उत्सवाचा समारोप झाला. संपूर्ण परिसरात देशभक्तीचा आणि उत्साहाचा माहोल अनुभवास आला.
संघ म्हणजे काय ?
संघ म्हणजे हिंदू अशी मर्यादा नाही संघ म्हणजे राष्ट्रप्रेम, संघटन, शिस्त, त्याग आणि आत्मियता. संघ समजुन घ्यायचा असेल तर भारत समजुन घ्यावा लागतो.
त्याची आत्मा, त्याची संस्कृती, त्याची जडघडण आणि त्याचे युगानुयुगी चालत आलेले मूल्य..!
आपण आज एका महत्वाच्या टप्प्यावर उभे आहोत शंभर वर्षांचा प्रवास..!
संघाची स्थापना ही एक ऐतिहासिक घटना होती, परंतु ती योगायोग नव्हती. ही होती भारताच्या सनातन राष्ट्रचेतनेची पुनरावृत्ती एक पुनरुत्थान..!
ज्यात राष्ट्रचेतना वेळोवेळी त्यात्या युगातील आव्हानांचा सामना करण्यासाठी नव-नविन अवतारांनी प्रकट होते. या युगात संघ त्याच अनादि राष्ट्रचेतनेचा पुण्यअवतार आहे. आणि यामुळेच भारत विश्वामध्ये आपला प्रभाव बुलंद करीत आहे.
सनातन संस्कृती – कालातीत आणि वैश्विक
आज रोमन, ग्रीक, युनानी यांसारख्या अनेक प्राचीन संस्कृती इतिहासात लोप पावल्या आहेत. परंतु भारताची सनातन संस्कृती जी केवळ काही शतकांपूर्वी नव्हे तर हजारोंवर्षांपूर्वी जन्मलेली आहे आजही तेजस्वी आहे. कारण ही संस्कृती केवळ धर्म नाही तर एक जीवनपध्दती आहे. ती संकुचित नाही – ती सर्वसमावेशक आहे.
