रायगड (प्रतिनिधी): देशातील सर्वात अत्याधुनिक विमानतळांपैकी एक ठरणाऱ्या नवी मुंबई आंतरराष्ट्रीय विमानतळाचे उद्घाटन पंतप्रधान नरेंद्र मोदी यांच्या हस्ते ८ ऑक्टोबर रोजी होणार आहे. उद्घाटनानंतर काही दिवस विमानतळावर चाचणी स्वरूपातील उड्डाणे सुरू होतील. प्रत्यक्ष व्यावसायिक उड्डाणांची सुरुवात डिसेंबर महिन्यात होण्याची शक्यता व्यक्त केली जात आहे. सूत्रांनी दिलेल्या माहितीनुसार, तिकिट विक्री ऑक्टोबरच्या अखेरीस सुरू होऊ शकते. सुरुवातीला देशांतर्गत उड्डाणांवर भर असेल. दिल्ली, कोलकाता, बेंगळुरू, पुणे यांसारख्या मोठ्या शहरांना येथून थेट सेवा मिळेल. त्यानंतर पुढील टप्प्यात आंतरराष्ट्रीय उड्डाणांची भर घालण्यात येईल.
दरम्यान, विमानतळाच्या पहिल्या टप्प्याचे बांधकाम पूर्ण झाले असून, त्यात एक टर्मिनल आणि एक रनवे समाविष्ट आहे. सुरुवातीला येथे प्रति तास ८ ते १० विमानांचे उड्डाण आणि आगमन होणार असून, पुढील काही महिन्यांत मागणी वाढल्यास हे प्रमाण २० ते ३० विमानांपर्यंत वाढवण्याचे नियोजन आहे. अधिकाऱ्यांनी सांगितले की, सर्व सुरक्षात्मक आणि तांत्रिक तपासण्या पूर्ण केल्यानंतर उड्डाणांना हिरवा कंदील मिळेल.
विमानतळ परिसरात प्रवाशांसाठी अत्याधुनिक सुविधा उपलब्ध असतील. मुंबईच्या छत्रपती शिवाजी महाराज आंतरराष्ट्रीय विमानतळाप्रमाणेच या विमानतळावरही प्रवाशांना कनेक्टिंग फ्लाइटसाठी थेट इमिग्रेशन सुविधा मिळणार आहे, त्यामुळे प्रवास अधिक सुकर होईल. या विमानतळामुळे मुंबई व नवी मुंबई परिसरातील प्रवाशांना मोठा दिलासा मिळणार असून, रायगड आणि नवी मुंबईत आर्थिक आणि पर्यटनाचा नवा अध्याय सुरू होईल, असा विश्वास व्यक्त करण्यात येत आहे.
