नवी मुंबई(प्रतिनिधी): देशातील सर्वात अत्याधुनिक विमानतळांपैकी एक असलेल्या नवी मुंबई आंतरराष्ट्रीय विमानतळाचे उद्घाटन पंतप्रधान नरेंद्र मोदी यांच्या हस्ते ८ ऑक्टोबर रोजी भव्य सोहळ्यात पार पडले. दीर्घ प्रतीक्षेनंतर साकार झालेला हा विमानतळ महाराष्ट्राच्या विकास यात्रेतील एक नवा टप्पा मानला जात आहे.
पंतप्रधान मोदी यांनी विमानतळाच्या अत्याधुनिक सुविधा, पर्यावरणपूरक रचना आणि देशाच्या अर्थव्यवस्थेला मिळणारा चालना यावर भाष्य केले. भाषणात पंतप्रधान मोदी यांनी लोकनेते दिबा पाटील यांचा विशेष उल्लेख करत त्यांना विनम्र अभिवादन केले. त्यांनी म्हटले की, ‘हा प्रकल्प फक्त तंत्रज्ञानाचा नाही, तर लोकांच्या त्यागाचा आणि स्वप्नांचा आहे. दि.बा. पाटीलांच्या योगदानाला आम्ही मनापासून सलाम करतो. पंतप्रधान मोदींच्या या उल्लेखाने प्रकल्पग्रस्त आणि स्थानिक ग्रामस्थांमध्ये समाधानाचे वातावरण निर्माण झाले. 
दीर्घकाळापासून लोकनेते दिबा पाटील यांच्या योगदानाला मान्यता मिळावी, अशी मागणी केली जात होती. पंतप्रधानांच्या भाषणात त्यांचा सन्मानपूर्वक उल्लेख झाल्याने भूमिपुत्रांनी आनंद व्यक्त केला. मात्र अद्यापही विमानतळाला अधिकृतरीत्या लोकनेते दि.बा. पाटीलांचे नाव जाहीर झाले नसल्याने प्रकल्पग्रस्तांमध्ये निराशेचे वातावरण आहे. तांत्रिक अडचणी असल्याने सुमारे ३ महिन्यांनी विमानतळाचे अधिकृतरीत्या नामकरण होईल, असे सांगण्यात येत आहे. मात्र हा विलंब प्रकल्पग्रस्तांमध्ये संभ्रम निर्माण करत असल्याचे चित्र आता दिसून येत आहे.
