अलिबाग (प्रतिनिधी): अलिबाग ते कुरूळ या प्रमुख रस्त्यावर खड्डे तर आहेत पण धुळीचे साम्राज्य निर्माण झाल्याने नागरिकांच्या दैनंदिन हालचालींना मोठा त्रास सहन करावा लागत आहे. या रस्त्यावरून दररोज शेकडो वाहने ये-जा करत असल्याने उडणाऱ्या धुळीमुळे वातावरण प्रदूषित होत असून श्वसनाचे आजार वाढण्याची भीती व्यक्त केली जात आहे.
रस्ता दुरुस्तीचे काम बराच काळ प्रलंबित असल्याने त्यावर पसरलेली सैल माती आणि धूळ प्रत्येक वाहनाच्या हालचालीसोबत हवेत पसरते. यामुळे शेजारील घरांमध्येही धूळ शिरत असून नागरिक त्रस्त झाले आहेत. शाळकरी मुले, वृद्ध आणि रुग्णांसाठी ही परिस्थिती अधिक धोकादायक ठरत आहे.
स्थानिक नागरिकांनी संबंधित विभागाचे लक्ष वेधून घेत तातडीने रस्त्यावर पाणी फवारणी करण्याची आणि रस्ता डांबरीकरणाची मागणी केली आहे. प्रशासनाने त्वरीत उपाययोजना केल्या नाहीत, तर आंदोलनाचा इशारा देण्यात आला आहे.
धुळीच्या समस्येमुळे आरोग्यावर गंभीर परिणाम होत असून स्वच्छतेच्या दृष्टीनेही हा मुद्दा गंभीर बनला आहे. अलिबाग-कुरूळ रस्त्यावर धुळीचा प्रश्न सुटण्यासाठी तातडीने उपाययोजना होणे आवश्यक असल्याची मागणी नागरिकांकडून होत आहे.
