अलिबाग (प्रतिनिधी): शिवसेना रायगड जिल्हा प्रमुख राजा केणी यांच्या पुढाकाराने आज पोयनाड येथे भव्य रोजगार मेळाव्याचे आयोजन करण्यात आले. या मेळाव्याच्या माध्यमातून शेकडो बेरोजगार तरुणांना रोजगाराच्या संधी उपलब्ध झाल्या.
या रोजगार मेळाव्यात जवळपास चाळीसहून अधिक नामांकित कंपन्यांनी सहभाग नोंदवला होता, तर अडीच हजारांहून अधिक तरुणांनी उपस्थित राहून नोकरीसाठी संधी साधली. विशेष म्हणजे, ज्या उमेदवारांची निवड झाली त्यांना त्याच ठिकाणी नियुक्तीपत्र देण्यात आले, ही या मेळाव्याची विशेषता ठरली.
रायगड जिल्हा परिषदेच्या माजी गटनेत्या मानसी दळवी यांच्या हस्ते मेळाव्याचे उद्घाटन करण्यात आले. यावेळी व्यासपीठावर शिवसेना महिला आघाडी संपर्क प्रमुख संजीवनी नाईक, कामगार नेते दीपक रानवडे, रसिका केणी आदी मान्यवर उपस्थित होते. कार्यक्रमाचे सूत्रसंचालन जीवन पाटील यांनी केले.
या उपक्रमाबद्दल बोलताना राजा केणी यांनी सांगितले की, जिल्ह्यातील बेरोजगार तरुणांना रोजगाराच्या संधी उपलब्ध करून देण्यासाठी हा रोजगार मेळावा आयोजित करण्यात आला असून भविष्यातही असे उपक्रम राबवले जातील.
