अलिबाग (प्रतिनिधी) : शाहरुख खान, रणवीर सिंग, दीपिका पादुकोण, अनुष्का शर्मा यांच्यानंतर आता बॉलिवूडचे महानायक अमिताभ बच्चन यांनीही अलिबागमध्ये घराचे स्वप्न साकार केले आहे. त्यांनी अलिबाग तालुक्यातील मुनवली येथे तब्बल ८,८८० चौ.फुटांचे तीन विकसित भूखंड ६ कोटी ५९ लाख रुपयांना खरेदी केले आहेत. या व्यवहाराची नोंदणी अलिबाग उपनिबंधक कार्यालयात झाली असून त्यांनी ३९.५८ लाख रुपये मुद्रांक शुल्क आणि ९० हजार रुपये नोंदणी शुल्क भरले आहे.
बच्चन यांनी घेतलेल्या भूखंडांमध्ये ३,७६० चौ.फुट (२.७९ कोटी), २,५८० चौ.फुट (१.९२ कोटी) आणि २,५४० चौ.फुट (१.८८ कोटी) असा समावेश आहे. पर्यटनस्थळ म्हणून ओळखले जाणारे अलिबाग अलीकडच्या काळात मोठ्या गुंतवणुकीचे केंद्र ठरले असून अनेक उद्योगपती, चित्रपट तारे आणि क्रिकेटपटूंनी येथे मालमत्ता घेतली आहे.
रो-रो सेवा, अटल सेतू आणि सुरू असलेला रेवस-करंजा पूल यामुळे मुंबई-अलिबाग अंतर एक तासावर येणार असून नवी मुंबई विमानतळापर्यंतची पोहोच सोपी होईल. यामुळे जमिनींचे भाव झपाट्याने वाढले आहेत. दुबईची एम्मार कंपनी, लोढा, हिरानंदानी, महिंद्रा मेरिडियन यांसारख्या दिग्गज कंपन्यांचे प्रकल्प येथे सुरू आहेत. त्यामुळे अलिबाग आता देशातील सर्वात आकर्षक गुंतवणूक केंद्रांपैकी एक ठरत आहे.
