अलिबाग (प्रतिनिधी) : राज्यात बालविवाहासारख्या सामाजिक प्रथेला आळा घालण्यासाठी सरकारकडून व्यापक आणि प्रभावी पातळीवर मोहीम राबवली जात आहे. काही ठिकाणी अद्यापही बालविवाहाच्या घटना आढळत असल्याने या प्रथेचे समूळ उच्चाटन करण्यासाठी जनजागृती आणि प्रबोधनाचे विशेष अभियान राबवण्याचे निर्देश प्रशासनाला देण्यात आले आहेत.
११ ऑक्टोबर २०२५ (आंतरराष्ट्रीय कन्या दिन) ते २६ जानेवारी २०२६ (प्रजासत्ताक दिन) या कालावधीत “बालविवाहमुक्त महाराष्ट्रासाठी १०० दिवस” हे विशेष अभियान राज्यभर राबवले जात आहे. या अभियानाचा आढावा घेताना संबंधित अधिकाऱ्यांना बालविवाह रोखण्यासाठी स्थानिक स्तरावर प्रभावी उपाययोजना करण्याच्या सूचना देण्यात आल्या.
शाळा सोडणाऱ्या मुलींचे प्रमाण कमी करण्यासाठी जिल्हा परिषद आणि माध्यमिक शाळांमध्ये विशेष उपक्रम राबवण्याचे निर्देश देण्यात आले असून, लैंगिक शिक्षणाबाबत जनजागृती करण्यावरही भर दिला जाणार आहे. तसेच मराठवाड्यातील ऊसतोड कामगारांच्या कुटुंबांमध्ये प्रत्यक्ष भेट देऊन बालविवाह प्रतिबंध आणि आरोग्याविषयी जागरूकता निर्माण करण्यावर प्रशासनाचे लक्ष केंद्रित आहे.
रायगड जिल्ह्यातील अलिबाग, कर्जत, पेन, सुधागड, मुरुड, रोहा, पनवेल, खालापूर आणि माणगाव या तालुक्यांमध्ये या अभियानाच्या सर्व उपाययोजना प्राधान्याने राबवण्याचे आदेश देण्यात आले आहेत. तसेच आदिशक्ती अभियान अंतर्गत कार्यरत ग्राम, तालुका, विभाग आणि राज्यस्तरीय समित्यांनीही या जनजागृती मोहिमेत सक्रीय सहभाग नोंदवावा, असे आवाहन करण्यात आले आहे.
या बैठकीस विभागाच्या आयुक्त श्रीमती नयना गुंडे, रायगड जिल्हा पोलिस अधीक्षक श्रीमती आंचल दलाल, जिल्हा परिषदेच्या मुख्य कार्यकारी अधिकारी श्रीमती नेहा भोसले, उपसचिव श्री आनंद भोंडवे, अवर सचिव श्री प्रसाद कुलकर्णी, सहआयुक्त श्री राहुल मोरे, जिल्हा महिला व बालविकास अधिकारी श्री श्रीकांत हावळे, श्रीमती सुजाता सकपाळ यांच्यासह दूरदृश्य प्रणालीद्वारे सर्व विभागीय उपायुक्त आणि संबंधित अधिकारी उपस्थित होते.
या १०० दिवसांच्या विशेष उपक्रमाद्वारे राज्य सरकारचे उद्दिष्ट – बालविवाहमुक्त महाराष्ट्र घडवणे आणि मुलींना शिक्षण, आरोग्य आणि सशक्त भविष्यासाठी संधी उपलब्ध करून देणे हे आहे.
