अलिबाग (प्रतिनिधी): बनावट नोटा प्रकरणातील आरोपी भूषण पतंगेच्या पोलिस कोठडीत झालेल्या संशयास्पद मृत्यूने रायगड पोलिसांच्या भूमिकेवर गंभीर प्रश्नचिन्ह निर्माण झाले आहे. आरोपीचा मृत्यू पोलिस ताब्यात असताना झाल्यानंतर पोलिसांनी फिट आल्याचे कारण सांगत जबाबदारी टाळण्याचा प्रयत्न केला, अशी टीका ताराराणी ब्रिगेडच्या प्रदेशाध्यक्षा वंदना मोरे यांनी केली आहे.
वंदना मोरे म्हणाल्या, “आरोपी पोलिसांच्या ताब्यात असताना त्याचा मृत्यू होतो आणि पोलिस केवळ ‘फिट्स आली एवढंच सांगतात, हे संशयास्पद नाही का? पोलिस कोठडीत मृत्यू होणे म्हणजेच गंभीर बाब असून अशा घटना लोकांचा पोलिसांवरील विश्वास डळमळीत करतात.”
या घटनेची सखोल आणि निष्पक्ष चौकशी व्हावी, तसेच मृत्यूमागील खरी कारणमीमांसा समोर यावी यासाठी त्या लवकरच राज्याचे गृहराज्यमंत्री योगेश कदम यांची भेट घेऊन अधिकृत निवेदन देणार असल्याचे त्यांनी स्पष्ट केले.
ताराराणी ब्रिगेडने भूषण पतंगे याच्या कृत्याचा निषेध केला आहे शिवाय रायगड पोलिसांनी त्याचा गुन्हा उघडकीस आणल्याबद्दल कौतुक केलं आहे. परंतु भूषण याच्या मृत्यू प्रकरणी पोलिसांकडे अंगुलीनिर्देश केला आहे. या प्रकरणात पारदर्शक चौकशीसह संबंधित पोलिसांवर जबाबदारी निश्चित करण्याची मागणी केली आहे. दरम्यान, या प्रकरणामुळे रायगड जिल्हा पोलिसांवर टीकेची झोड उठली असून नागरिकांमध्येही संतापाचे वातावरण निर्माण झाले आहे.
