अलिबाग (प्रतिनिधी): उमटे धरणावर उभारण्यात आलेला फिल्टर प्लांट केवळ कोट्यवधींची बिले काढण्यासाठीच उभारण्यात आल्याचा गंभीर आरोप उमटे धरण संघर्ष ग्रुपचे अँड. राकेश पाटील यांनी केला आहे. संबंधित प्लांटमध्ये काही वर्षांपूर्वी एका कर्मचाऱ्याचा मृतदेह कुजलेल्या अवस्थेत सापडला होता, आणि त्याच ठिकाणी प्रक्रिया केलेले पाणी नागरिकांना पुरवले गेले असल्याचे त्यांनी सांगितले. मागील सहा वर्षांपासून या भागात शुद्ध पाण्याचा पुरवठा होत नसल्याने नागरिक त्रस्त आहेत.
दरम्यान, या फिल्टर प्लांटमध्ये प्रत्यक्ष काम न करणाऱ्या अनेक कर्मचाऱ्यांना आजही पगार दिला जात असल्याचा धक्कादायक प्रकार समोर आला आहे. पाणीपुरवठा विभागातील या गैरकारभारावर म.जी.प्रा. कार्यकारी अभियंता, माणगाव यांनीही आपल्या अहवालात ताशेरे ओढले असल्याचे समजते.
उमटे धरणावरील कामे आणि जिल्हा परिषदेने केलेल्या खर्चाची सखोल चौकशी करण्यात यावी, अशी मागणी उमटे धरण संघर्ष ग्रुपने केली असून, या प्रकरणाकडे संबंधित विभागांनी गांभीर्याने लक्ष देण्याची गरज आहे.
