मुरुड (प्रतिनिधी): मुरुड तालुक्यातील बोरली मांडला येथे ॲड. मोहिनेश ठाकूर व सौ. अश्विनी ठाकूर यांच्या नवीन कार्यालयाचे उद्घाटन भाजप नेते व माजी आमदार सुभाष उर्फ पंडितशेठ पाटील यांच्या शुभहस्ते संपन्न झाले. या प्रसंगी भाजप रायगड जिल्हा अध्यक्ष (अल्पसंख्यांक मोर्चा) लियागत खोत, मुरुड तालुका भाजप जिल्हा उपाध्यक्ष रमेश दिवेकर, तसेच स्थानिक मान्यवर, सामाजिक कार्यकर्ते आणि नागरिक मोठ्या संख्येने उपस्थित होते.
उद्घाटनानंतर झालेल्या कार्यक्रमात माजी आमदार सुभाष पाटील यांनी ठाकूर दाम्पत्याचे अभिनंदन करत त्यांच्या पुढील कार्यासाठी शुभेच्छा दिल्या. त्यांनी सांगितले की, “ग्रामीण भागातील तरुण वकील समाजासाठी नवी दिशा देत आहेत. अशा उपक्रमांमुळे जनतेला न्याय मिळवणे अधिक सुलभ होते.”
ॲड. मोहिनेश ठाकूर यांनी उपस्थित मान्यवरांचे आभार मानत सांगितले की, हे कार्यालय केवळ व्यावसायिक कार्यासाठी नसून सामान्य नागरिकांच्या कायदेशीर समस्यांवर मदत व मार्गदर्शन देण्यासाठी खुले असेल. कार्यक्रमानंतर उपस्थितांना अल्पोपहार देण्यात आला.
बोरली मांडला परिसरात नव्या ऑफिसच्या उद्घाटनाने आनंदाचे वातावरण निर्माण झाले असून स्थानिक नागरिकांनी ठाकूर दाम्पत्याचे अभिनंदन केले.
