रायगड (प्रतिनिधी): कर्जत तालुक्यातील दहिवली परिसरात पिसाळलेल्या बैलाच्या हल्ल्यात एकाचा मृत्यू झाला असून, पाच जण जखमी झाले आहेत. जखमींपैकी एकाची प्रकृती चिंताजनक असल्याचे समजते. या घटनेमुळे परिसरात भीतीचे वातावरण पसरले आहे.
गेल्या दोन दिवसांपासून दहिवली आणि श्रीराम पुल परिसरात हा बैल विनामालक अवस्थेत फिरताना दिसत होता. बुधवारी रात्रीपासून त्याने धुडगूस घालण्यास सुरुवात केली. रस्त्याने जाणाऱ्या नागरिकांवर, तसेच वाहनांवर हल्ले करून या बैलाने मोठा त्रास निर्माण केला.
बुधवारी रात्री या बैलाने दहिवलीतील नऊ वर्षीय आदित्य कनोजिया याच्यावर हल्ला केला. त्यानंतर गुरुवारी सकाळी फिरण्यासाठी बाहेर पडलेल्या मंजुळा चव्हाण (वय ६५) आणि योगिता थोरवे (वय ४४) यांच्यावरही हल्ला झाला. यात मंजुळा चव्हाण गंभीर जखमी झाल्या असून त्यांना तातडीने पनवेल येथील रुग्णालयात हलविण्यात आले. योगिता थोरवे यांच्यावर कर्जत रुग्णालयात उपचार सुरू आहेत.
याच सकाळी संभाजी नगर येथील अर्जुन म्हसे (वय ७०) मॉर्निंग वॉकसाठी बाहेर पडले असता बैलाने त्यांच्यावरही हल्ला केला. या हल्ल्यात म्हसे यांचा दुर्दैवी मृत्यू झाला. इतर काही वाटसरूंनाही किरकोळ दुखापत झाल्याची माहिती मिळाली आहे.
घटनेची माहिती मिळताच कर्जत पोलीस आणि नगरपालिकेच्या पथकांनी घटनास्थळी धाव घेतली. पिसाळलेल्या बैलाला पकडण्यासाठी विशेष मोहीम राबवण्यात आली असून, मोहिमेदरम्यान दहिवली परिसरातील वाहतूक काही काळासाठी बंद ठेवण्यात आली होती.
या घटनेमुळे नागरिकांमध्ये भीतीचे आणि संतापाचे वातावरण निर्माण झाले असून, संबंधित प्रशासनाने अशा घटनांची पुनरावृत्ती टाळण्यासाठी आवश्यक ती उपाययोजना करावी, अशी मागणी स्थानिकांनी केली आहे.
