अलिबाग(प्रतिनिधी): परतीच्या पावसाने दणका दिल्यानंतर आता रायगडसह संपूर्ण कोकण किनारपट्टीवर जोरदार पावसाला सुरुवात झाली आहे. या अवकाळी पावसामुळे जिल्ह्यातील जनजीवन विस्कळीत झाले असून, रायगड जिल्हा प्रशासनाने नागरिकांना सतर्कतेचा इशारा दिला आहे.
हवामान विभागाचा इशारा
अरबी समुद्रात निर्माण झालेल्या कमी दाबाच्या पट्ट्यामुळे कोकणासह राज्यातील काही भागांमध्ये पावसाचा जोर वाढला आहे. हवामान खात्याने रायगडसह संपूर्ण कोकणात ३० ऑक्टोबरपर्यंत पावसाचा यलो अलर्ट जाहीर केला आहे. शनिवारी संध्याकाळपासून काळे ढग जमू लागले होते, तर रविवारी सकाळपासून जिल्ह्याच्या विविध भागांमध्ये मध्यम ते जोरदार सरी कोसळू लागल्या.
कापणीची कामे ठप्प
अवकाळी पावसामुळे शेतकऱ्यांचे मोठे नुकसान झाले आहे. मागील काही दिवसांपासून संध्याकाळी कोसळणाऱ्या सरींमुळे कापणी केलेल्या भातपिकांचे नुकसान झाले आहे. आजच्या पावसाने पुन्हा कापलेले पीक भिजले असून, शेतकऱ्यांनी पुढील तोटा टाळण्यासाठी कापणीची कामे थांबवली आहेत. शेतकरी आता हवामान स्थिर होण्याची वाट पाहत आहेत.
पर्यटन व्यवसायावर पावसाची छाया
दिवाळी सुटीच्या पार्श्वभूमीवर रायगडातील विविध पर्यटनस्थळांवर मोठ्या प्रमाणात पर्यटकांनी गर्दी केली होती. मात्र सततच्या पावसामुळे पर्यटकांचा हिरमोड झाला असून, किनाऱ्यांवरील गर्दी लक्षणीयरीत्या कमी झाली आहे. मुरूड-जंजिरा किल्ल्याकडे जाणारी जलवाहतूक सेवा बंद असल्याने अनेक पर्यटकांना निराश होऊन परतावे लागले. त्यामुळे स्थानिक व्यावसायिकांमध्येही नाराजीचे वातावरण आहे.
जलवाहतूक आणि मासेमारीवर परिणाम
खराब हवामानामुळे किनाऱ्यांवर तीन नंबरचा इशारतीचा बावटा लावण्यात आला आहे. त्यामुळे गेटवे ऑफ इंडिया ते मांडवा जलवाहतूक सेवा शनिवारी संध्याकाळपासून बंद करण्यात आली आहे. नियमित प्रवाशांबरोबरच पर्यटकांनाही या निर्णयाचा फटका बसला असून, आता त्यांना रस्त्याने प्रवास करावा लागत आहे.
समुद्र खवळलेला असल्याने मच्छीमारांना खोल समुद्रात न जाण्याचा इशारा प्रशासनाने दिला आहे.
प्रशासनाचा सतर्कतेचा इशारा
रायगड जिल्हा प्रशासनाने नागरिकांना सावध राहण्याचे आणि समुद्रकिनाऱ्यांपासून दूर राहण्याचे आवाहन केले आहे.
