अलिबाग (प्रतिनिधी): कोकणासह रायगड जिल्ह्यात झालेल्या अवकाळी पावसामुळे शेतकर्‍यांच्या हाता तोंडाशी आलेला घास निसर्गाने हिरावून घेतला आहे, शासनाने त्वरित सरसकट पंचनाने करून शेतकर्‍यांना आर्थिक मदत जाहीर करावी असे धोरण राज्य शासनाने घेतले पाहिजे अशी मागणी शेकाप सरचिटणीस, मा. आमदार जयंत पाटील केली. 
अवकाळी पावसाने महाराष्ट्रासह कोकण, रायगड मधील शेतकर्‍यांचे अतोनात नुकसान झाले आहे. या सर्वांना सरसकट आर्थिक मदत मिळाली पाहिजे ही शेकापची आग्रही भूमिका आहे या संदर्भात उद्या सकाळी शेतकरी भवन अलिबाग येथे बैठकीचे आयोजन करण्यात आलेले आहे.
तोंडाशी आलेला घास काढून घेण्याचे काम निसर्गाने केलेले आहे, त्या दृष्टीकोणातून पंचनाम्या करिता विलंब न लावता सरसकट शासनाने नुकसान भरपाई जाहीर करावी अशी मागणी शेकाप तर्फे करण्यात येत आहे. सर्वत्र भयानक परिस्थिति उद्भवली आहे, चांगले पीक यावेळी आले होते, चांगले आलेले पीक आणि कापलेले पीक हे पाण्याखाली गेले आहे पीक भिजले आहे. सर्वच ठिकाणी तलाठी आणि सर्कल यांना शेताच्या बांधावर जाऊन पाहणी करणे शक्य होत नाही आहे म्हणून सरकार कडून सर्व शेतकर्‍यांना सरसकट नुकसान भरपाई मिळाली पाहिजे असे जिल्हाधिकारी यांनी जाहीर केले पाहिजे तसा रिपोर्ट राज्य शासनाला त्यांनी दिला पाहिजे अशी शेकापच्या वतीने जयंत पाटील यांनी मागणी केली आहे.
