अलिबाग (प्रतिनिधी): अलिबाग शहरातील वाढत्या कचरा समस्येबाबत भाजपकडून आक्रमक भूमिका घेण्यात आली आहे. भाजपचे ज्येष्ठ नेते व माजी आमदार सुभाष उर्फ पंडितशेठ पाटील आणि भाजप जिल्हाध्यक्षा चित्राताई पाटील यांनी आज जिल्हाधिकारी किशन जावळे यांची भेट घेऊन कचरा व्यवस्थापनासंबंधी सविस्तर चर्चा केली.
अलिबाग शहर आणि आसपासच्या भागात कचऱ्याचे वाढते प्रमाण नागरिकांच्या आरोग्यास आणि पर्यावरणास गंभीर धोका निर्माण करत आहे. या पार्श्वभूमीवर शहरातील घनकचरा व्यवस्थापन प्रकल्प, संकलन व्यवस्था आणि प्रक्रिया केंद्रांची सुधारणा करण्याची गरज असल्याचे दोन्ही नेत्यांनी जिल्हाधिकाऱ्यांच्या निदर्शनास आणून दिले.
पंडित पाटील यांनी परिसरातील विविध उद्योग कंपन्यांच्या सीएसआर निधीचा वापर कचरा व्यवस्थापनासाठी करण्याची आवश्यकता व्यक्त केली. “स्थानिक कंपन्यांनी सामाजिक जबाबदारी म्हणून या समस्येवर ठोस पाऊल उचलावे,” असे ते म्हणाले. जिल्हाध्यक्षा चित्रा पाटील यांनीही प्रशासनाला तत्काळ कार्यवाही करण्याचे आवाहन केले.
या बैठकीत जिल्हाधिकाऱ्यांनी विषयाची गंभीर दखल घेत लवकरच सुधारित कृती आराखडा सादर करण्याचे आश्वासन दिले. भाजपकडून पुढील काही दिवसांत या विषयावर ठोस पावले उचलण्याची शक्यता व्यक्त केली जात आहे.
