अलिबाग(प्रतिनिधी): शिवसेना महिला संघटन अलिबाग आणि उद्यम सखी संस्था यांच्या संयुक्त विद्यमाने “लोकरीपासून रंगोळी मॅट” ही दोन दिवसांची विशेष कार्यशाळा उत्साहात पार पडली. दिवाळीच्या पार्श्वभूमीवर पारंपरिक कलांना नवा आधुनिक स्पर्श देण्यासाठी या उपक्रमाचे आयोजन करण्यात आले होते.
कार्यशाळेचे उद्घाटन माजी पंचायत समिती सदस्या जुईली दळवी जुईकर, संजीवनी नाईक यांच्या हस्ते करण्यात आले. तर मार्गदर्शन प्रार्थना नागवेकर आणि प्रणिता म्हात्रे यांनी केले. ही कार्यशाळा दि. २८ व २९ ऑक्टोबर २०२५ रोजी राममंदिर, ब्राह्मणआळी, अलिबाग येथे पार पडली. सहभागासाठी नाममात्र शुल्क ₹२५० ठेवण्यात आले होते, मात्र उधम सखी सभासदांसाठी प्रवेश निशुल्क होता.
महिलांना घरबसल्या उद्यमशीलतेकडे प्रेरित करण्याचे उद्दिष्ट या उपक्रमामागे असून, रंगीबेरंगी लोकरीपासून आकर्षक रंगोळी मट तयार करण्याचे प्रशिक्षण देण्यात आले. या कार्यशाळेत तब्बल ३५ महिलांनी उत्स्फूर्त सहभाग नोंदवला.
कार्यक्रमाच्या समारोपप्रसंगी माजी जिल्हा परिषद सदस्या मानसीताई दळवी यांनी उपस्थित राहून सहभागी महिलांचे कौतुक केले आणि त्यांच्या कलागुणांना प्रोत्साहन दिले. हा उपक्रम महिलांच्या सक्षमीकरणासाठी एक प्रेरणादायी पाऊल ठरला.
तसेच सर्व जिल्ह्यात अश्या प्रकारचे विविध प्रशिक्षण देण्याचं उद्देश जाहीर केला.
