अलिबाग (प्रतिनिधी):अलिबाग गेटवे ऑफ इंडिया, मुंबई ते मांडवा-अलिबाग या जलमार्गावरून दररोज प्रवास करणाऱ्या हजारो प्रवाशांसाठी मांडवा जेट्टी हा प्रमुख दुवा मानला जातो. मात्र सध्या या जेट्टीची अवस्था अत्यंत दयनीय झाली असून पुलाच्या खांबांवरील सिमेंट गळून पडल्यामुळे लोखंडी सळ्या बाहेर आल्याचे स्पष्ट दिसत आहे. त्यामुळे या जेट्टीला कोणत्याही क्षणी धोका निर्माण होऊन ती कोसळण्याची भीती व्यक्त केली जात आहे.
गेल्या दोन महिन्यांच्या विश्रांतीनंतर जलवाहतूक पुन्हा सुरु झाली असली तरी जेट्टीच्या जीर्ण अवस्थेमुळे प्रवाशांचा जीव अक्षरशः धोक्यात आला आहे. गेटवे, मुंबईहून अलिबाग, मुरुड, श्रीवर्धनकडे जाणारे हजारो प्रवासी व पर्यटक दररोज या मार्गाचा वापर करतात. वेळ आणि इंधनाची बचत तसेच आरामदायी प्रवासामुळे हा मार्ग लोकप्रिय झाला असला तरी जेट्टीची दुरवस्था चिंताजनक ठरत आहे.
जेट्टीवरील शेडची पत्रे गंजल्यामुळे ती काढण्यात आली आहेत, मात्र नवीन पत्रे बसविण्याचे काम अत्यंत संथगतीने सुरु आहे. त्यामुळे पावसाळ्यात प्रवाशांना पावसात भिजत उभे राहावे लागते, तर उन्हाळ्यात उन्हाचा त्रास सहन करावा लागतो.
तसेच, जेट्टीवर मंत्री, आमदार, खासदार आणि प्रतिष्ठित व्यक्तींना घेण्यासाठी मोठ्या प्रमाणावर चारचाकी वाहने ये-जा करतात. या वाहनांच्या वाढत्या वर्दळीमुळे जेट्टीच्या स्थैर्यावर अधिकच धोका निर्माण झाला आहे. त्यामुळे जेट्टीवर वाहनांच्या प्रवेशावर तातडीने बंदी घालावी, अशी मागणी प्रवाशांकडून होत आहे.
स्थानिक नागरिक, प्रवासी आणि पर्यटकांनी महाराष्ट्र सागरी मंडळाचे लक्ष वेधून घेत तातडीने दुरुस्तीची कामे हाती घेण्याची मागणी केली आहे. अन्यथा ही जेट्टी कोसळून प्रवासी वाहतूक ठप्प होण्याची आणि मोठी दुर्घटना घडण्याची शक्यता नाकारता येत नाही.
