मुरुड (प्रतिनिधी): मुरुड तालुक्यात झालेल्या नैसर्गिक आपत्तीमुळे बाधित शेतकऱ्यांच्या नुकसानीचे अंदाजपत्रक तयार करण्याचे काम वेगाने सुरू असून आतापर्यंत सुमारे ७० टक्के पंचनामे पूर्ण झाले आहेत. जिल्हा उपाध्यक्षा भाजप ॲड. मनस्वी मोहिते यांनी सांगितले की, शासनाच्या विद्यमान नियमांनुसार प्रति हेक्टरी केवळ ८,५०० रुपयांची मदत मिळते, परंतु ही रक्कम आजच्या परिस्थितीत अत्यंत अपुरी आहे. शेतकऱ्यांचे वास्तविक नुकसान लक्षात घेता शासनाने हा दर तातडीने वाढवावा, अशी मागणी त्यांनी केली.
ॲड.मोहिते म्हणाल्या की, “जुना शासन निर्णय बदलून शेतकऱ्यांना किमान प्रति हेक्टरी ५० हजार रुपये मदत मिळावी, यासाठी आम्ही शासनपातळीवर प्रयत्न करणार आहोत.” स्थानिक प्रशासन आणि कृषी विभागाच्या अधिकाऱ्यांनी नुकसानीचे तातडीने व अचूक पंचनामे पूर्ण करून अहवाल शासनाकडे पाठवावेत, असे आवाहन त्यांनी केले. शेतकऱ्यांना त्वरित आर्थिक दिलासा देण्यासाठी सर्व स्तरांवर पाठपुरावा सुरू असल्याचेही त्यांनी नमूद केले.
