अलिबाग (प्रतिनिधी): अलिबाग तालुक्यातील अलिबाग-रोहा मार्गावर वढाव ते खानाव दरम्यानचा साकव सोमवारी (दि. ३) सायंकाळी सात वाजण्याच्या सुमारास कोसळला. या घटनेमुळे या मार्गावरील वाहतूक पूर्णपणे ठप्प झाली असून, दोन्ही बाजूंना वाहनांच्या लांबच लांब रांगा लागल्या आहेत.
सार्वजनिक बांधकाम विभागाच्या गलथान कारभारामुळे प्रवाशांना मोठा त्रास सहन करावा लागत आहे. अपघाताच्या वेळी एक दुचाकी साकवावरून जात असताना सुदैवाने चालक बचावला, तर दुसऱ्या एका चालकाला किरकोळ दुखापत झाल्याची प्राथमिक माहिती मिळाली आहे.
स्थानिक प्रशासन आणि सार्वजनिक बांधकाम विभागाचे अधिकारी घटनास्थळी दाखल झाले असून, दुरुस्ती व वाहतूक व्यवस्थापनाचे प्रयत्न सुरू आहेत.
