राजाभाई केणींनी दिलेला शब्द पाळला; आधी रस्ता, मग करुन घेतला पक्षप्रवेश
अलिबाग (प्रतिनिधी): अलिबाग तालुक्यातील जिल्हा परिषदेच्या आंबेपुर मतदारसंघातील ताडवागळे ग्रामपंचायत हद्दीत धडाकेबाज राजकीय वळण घेत संपूर्ण वाघजाई गावकऱ्यांनी शिवसेनेचे जिल्हाप्रमुख राजाभाई केणी यांच्या नेतृत्वाखाली शिवसेनेत जाहीर प्रवेश केला. तब्बल पन्नास वर्षे शेतकरी कामगार पक्षाशी निष्ठा ठेवूनही गावास विकासाचा स्पर्श न झाल्याने ग्रामस्थांमध्ये प्रचंड असंतोष निर्माण झाला होता. गावाला मुख्य रस्त्याशी जोडणारा अत्यंत महत्त्वाचा एक किलोमीटरचा रस्ता वर्षानुवर्षे रखडून पडला होता.
गावात जाण्यासाठी रस्ता नसल्याने पावसाळ्यात विद्यार्थी आणि महिलांची चांगलीच तारांबळ उडत असे. शेतीमाल वाहतुकीत अडथळे निर्माण होत; शाळकरी मुलांचे हाल, रुग्णवाहिकेला प्रवेश न मिळणे,अशा एक ना अनेक अडचणींना ग्रामस्थांना तोंड द्यावे लागत असे.गंभीर आजारांमध्ये आजारी व्यक्तींना डोलीवरून बाहेर काढावे लागत असल्याच्या घटनाही अधोरेखित झाल्या. मागण्या केवळ कागदावर,आश्वासने केवळ सभेत — अशी परिस्थिती कायम राहिल्याने ग्रामस्थ संतप्त झाले होते. “रस्ता द्या, नाहीतर आम्ही सोबत नाही!” असा ठाम इशारा त्यांनी शेकापच्या नेत्यांना दिला; मात्र ही मागणी पूर्ण होऊ शकली नाही.
अशा परिस्थितीत वाघजाई ग्रामस्थांचा संपर्क शिवसेनेचे जिल्हाप्रमुख राजाभाई केणी यांच्याशी आला. “रस्ता पूर्ण झाला कीच पक्षप्रवेश करा,” असा शब्द त्यांनी ग्रामस्थांना दिला.आश्वासन देऊन थांबण्याऐवजी केणी यांनी काही महिन्यांतच हा रस्ता पूर्णत्वास नेला. आज या नव्या रस्त्याचे उद्घाटन त्यांच्या हस्ते उत्साहात पार पडले. विशेष म्हणजे, या नव्या रस्त्यावरूनच गावात दाखल होत त्यांनी ऐतिहासिक पक्षप्रवेश सोहळ्यास हजेरी लावली. ढोल–ताशांचा निनाद, शिवसेनेच्या घोषणांनी परिसर दणाणून गेला.
यावेळी रसीकाताई केणी, ज्येष्ठ नेते उत्तमशेठ पाटील, शिवसेना विभाग प्रमुख स्वप्निल म्हात्रे संपर्कप्रमुख शैलेश पाटील युवा सेनेचे संकेत पाटील अक्षय पाटील जीवन पाटील, हरिश्चंद्र म्हात्रे, प्रदीप केणी, रेश्मा जोशी, सुकेशिनी पाटील, अर्चना पाटील, संचिता पाटील आदी मान्यवर उपस्थित होते. नव्या कार्यकर्त्यांचे स्वागत करताना केणी म्हणाले, “दाखवून विकास करणे हीच आमची शैली. शब्द दिला की पाळतो!”
दरम्यान, शेतकरी कामगार पक्षाच्या निष्क्रिय कारभारावर ग्रामस्थांनी संताप व्यक्त केला. “वर्षानुवर्षे फसवणूक — पुरे झालं!” अशा भावना कानावर आल्या. या निर्णयामुळे आगामी स्थानिक राजकारणात शिवसेनेची पकड अधिक मजबूत होणार असून प्रतिस्पर्ध्यांसमोर कठीण आव्हान उभे राहणार आहे. वर्षानुवर्षे दुर्लक्षित राहिलेल्या वाघजाईने अखेर विकासाला प्राधान्य देणाऱ्या नेतृत्वावर विश्वास दाखवत राजकीय समीकरणात भूकंप घडणार हे निश्चित मानले जात आहे!
