मुंबई-पुणे एक्सप्रेसवेवर धावत्या ट्रकला भीषण आग; चालक थोडक्यात बचावला


रायगड (प्रतिनिधी):मुंबई-पुणे एक्सप्रेसवेवरील आडोशी बोगद्याजवळ धावत्या ट्रकला आज पुन्हा एकदा भीषण आग लागल्याची घटना घडली. या आगीत ट्रक पूर्णपणे जळून खाक झाला असला तरी, चालकाने वेळेवर ट्रक थांबवून बाहेर उडी घेतल्याने मोठी जीवितहानी टळली.

मिळालेल्या माहितीनुसार, ट्रक मुंबईहून पुण्याकडे जात असताना आडोशी बोगद्याजवळ पोहोचताच शॉर्टसर्किटमुळे अचानक आग लागली. काही क्षणांतच आगीने ट्रकच्या केबिनला वेढले. मात्र, चालकाच्या चातुर्यामुळे त्याने ट्रक रस्त्याच्या कडेला थांबवून बाहेर उडी घेतली आणि त्यामुळे तो थोडक्यात बचावला.

घटनेची माहिती मिळताच बोरघाट पोलीस, खोपोली पोलीस तसेच हेल्प फाउंडेशनचे सदस्य तात्काळ घटनास्थळी दाखल झाले. त्यांनी अग्निशमन दलाला बोलावून आग विझवण्याचे प्रयत्न केले, मात्र तोपर्यंत ट्रक पूर्णपणे जळून खाक झाला होता.

कालच बोरघाट पोलीस चौकीजवळ धावत्या ट्रकला आग लागल्याची घटना घडली होती. त्यानंतर अवघ्या एका दिवसातच पुन्हा अशीच घटना घडल्याने वाहनचालकांमध्ये चिंतेचे वातावरण निर्माण झाले आहे.

या घटनेनंतर काही काळ एक्सप्रेसवेवरील वाहतूक थांबवण्यात आली होती. आग विझवल्यानंतर वाहतूक पुन्हा सुरळीत करण्यात आली आहे.