पुणे (प्रतिनिधी): मुंबई–पुणे जुन्या महामार्गावर कामशेत परिसरात आज पहाटे भीषण अपघात झाला. वारकऱ्यांच्या दिंडीत एक कंटेनर घुसल्याने या दुर्घटनेत एका वारकरी महिलेचा जागीच मृत्यू झाला असून सात ते आठ जण गंभीर जखमी झाले आहेत.
मिळालेल्या माहितीनुसार, नवी मुंबईतील उरण परिसरातून सुमारे दीडशे वारकरी कार्तिकी वारीसाठी आळंदीकडे पायी प्रवास करत होते. पहाटे कामशेतजवळ रस्ता ओलांडत असताना या दिंडीत कंटेनर घुसल्याने मोठा अपघात घडला. या अपघातात प्रियंका तांडेल या वारकरी महिलेचा मृत्यू झाला, तर इतर सात ते आठ जण गंभीर जखमी झाले असून त्यांच्यावर जवळच्या रुग्णालयात उपचार सुरू आहेत.
या दुर्घटनेनंतर महामार्गावर तणावाचे वातावरण निर्माण झाले. कामशेत परिसरातील सुमारे ४० गावांतील ग्रामस्थांनी आणि दिंडीत सहभागी वारकऱ्यांनी संतप्त होऊन मुंबई–पुणे जुना महामार्ग रोखून धरला आहे. मागील तीन तासांपासून वाहतूक ठप्प झाली असून मोठ्या प्रमाणावर वाहनांची कोंडी झाली आहे.
ग्रामस्थांचा आग्रह आहे की, या ठिकाणी वारंवार अपघात होत असल्याने तातडीने उड्डाणपूल किंवा भुयारी मार्ग बांधण्यात यावा. जोपर्यंत प्रशासनातील वरिष्ठ अधिकारी घटनास्थळी येऊन ठोस लेखी आश्वासन देत नाहीत, तोपर्यंत महामार्ग खुला केला जाणार नाही, असा इशारा संतप्त ग्रामस्थांनी दिला आहे.
