अवघ्या २२ वर्षांच्या अक्षया नाईक या तरुण, ऊर्जावान आणि सुशिक्षित व्यक्तिमत्त्वाने राजकारणात आपले पहिले पाऊल टाकले आहे. फॅशन डिझायनिंगचे शिक्षण घेत असतानाच समाजकारणाची ओढ त्यांना लहानपणापासूनच होती. समाजातील गरिब, वंचित घटकांसाठी काम करण्याची प्रेरणा त्यांना त्यांच्या कुटुंबातून मिळाली. त्यामुळे शिक्षणासोबतच सामाजिक कार्याची सांगड घालत त्यांनी अनेक उपक्रमांमध्ये सहभाग घेतला.
शेतकरी कामगार पक्षाने (शेकाप) या निवडणुकीत अक्षया नाईक यांच्या रूपाने तरुणाईचा नवा चेहरा दिला आहे. पक्षाच्या विविध सामाजिक, सांस्कृतिक आणि राजकीय कार्यक्रमांमध्ये त्या सक्रियपणे सहभागी होत आल्या आहेत. महिलांचे सक्षमीकरण, तरुणांसाठी रोजगारनिर्मिती आणि शिक्षण क्षेत्रातील सुधारणा या विषयांवर त्यांनी नेहमीच ठोस भूमिका घेतली आहे.
अक्षया नाईक यांनी यापूर्वी कधीही निवडणूक लढवलेली नसली तरी त्यांचा आत्मविश्वास, प्रामाणिक दृष्टिकोन आणि समाजासाठी काहीतरी करून दाखवण्याची जिद्द यामुळे त्या सर्वांच्या अपेक्षांचे केंद्रबिंदू ठरत आहेत. शेकापने त्यांच्यावर ठेवलेला विश्वास हा तरुण नेतृत्वाला प्रोत्साहन देणारा निर्णय ठरत आहे. त्यांच्या माध्यमातून पक्षाला तरुणाईचा जोम आणि महिलांच्या सहभागाची नवी दिशा मिळेल, असा विश्वास कार्यकर्त्यांमध्ये व्यक्त होत आहे.
