अलिबाग(प्रतिनिधी):दिल्ली येथे घडलेल्या घटनेच्या अनुषंगाने माननीय पोलीस अधीक्षक आंचल दलाल यांच्या निर्देशानुसार अलिबाग पोलीस ठाणे हद्दीत सुरक्षा यंत्रणा सतर्क करण्यात आली आहे. अलिबाग, अक्षी, थळ, चाळमाळा, नवगाव आणि वरसोली या प्रमुख लँडिंग पॉईंटवर पोलिसांनी कडक सुरक्षा व्यवस्था तैनात केली असून, समुद्रमार्गे येणाऱ्या-जाणाऱ्या सर्व बोटींची सखोल तपासणी केली जात आहे.
तसेच अलिबाग शहरातील प्रमुख प्रवेशद्वार (इंट्री) आणि निर्गमन (एक्झिट) पॉईंटवर नाकाबंदी करण्यात आली असून, सर्व संशयित वाहनांची काटेकोर तपासणी केली जात आहे. अलिबाग पोलीस निरीक्षक किशोर साळे आणि कर्मचारी हे दिवस-रात्र गस्त वाढवून नागरिकांच्या सुरक्षेसाठी सतत दक्ष आहेत. कोणतीही संशयास्पद हालचाल दिसल्यास त्वरित पोलिसांना कळविण्याचे आवाहनही करण्यात आले आहे.
अलिबाग पोलिसांच्या या तत्परतेमुळे परिसरात सुरक्षेची भावना अधिक बळकट झाली असून नागरिकांनीही सहकार्याचे आवाहन केले आहे.
