अलिबाग(प्रतिनिधी):अलिबाग तालुक्यातील श्रीगाव ग्रामपंचायत हद्दीतील श्रीगाव गावातील अंतर्गत रस्त्यांचे रखडलेले काम अखेर मार्गी लागले आहे. शिवसेना रायगड जिल्हाप्रमुख राजाभाई केणी यांच्या प्रयत्नातून अनेक वर्षांपासून प्रलंबित असलेल्या डांबरीकरणाच्या कामाला आज सुरुवात झाली. स्थानिक नागरिकांच्या दीर्घकाळच्या मागणीला प्रतिसाद देत हे काम सुरू करण्यात आले असून, या रस्त्यांमुळे गावातील नागरिकांना वाहतुकीची मोठी सोय होणार आहे.
कामाच्या प्रारंभी राजाभाई केणी यांनी स्वतः उपस्थित राहून कामाची पाहणी केली आणि संबंधित अधिकाऱ्यांना दर्जेदार काम करण्याचे निर्देश दिले. त्यांनी सांगितले की, विकासकामे ही सामान्य जनतेच्या सोयीसाठी असून शिवसेना नेहमीच लोकांच्या समस्यांवर उपाय देण्यास कटिबद्ध आहे. श्रीगाव परिसरातील नागरिकांनी या कामाबद्दल समाधान व्यक्त केले आणि राजाभाई केणी यांचे आभार मानले.
