पुणे (प्रतिनिधी) : पुणे शहरात रविवारी पहाटे भीषण अपघाताची घटना घडली असून नवले पुलावर झालेल्या या अपघातात पाच जणांचा मृत्यू झाला आहे, तर २० जण गंभीररीत्या जखमी झाले आहेत. अपघातानंतर दोन ते तीन वाहनांना आग लागल्याने परिसरात एकच गोंधळ उडाला.
प्राथमिक माहितीनुसार, तीन ते चार वाहनांची जोरदार धडक होऊन अपघात झाला. या दरम्यान दोन कंटेनर आणि एका कारला भीषण आग लागली. जळालेल्या कारमध्ये एकाच कुटुंबातील सदस्य प्रवास करत असल्याची शक्यता व्यक्त केली जात आहे. घटनेनंतर तात्काळ पोलिसांनी आणि अग्निशमन दलाने घटनास्थळी धाव घेत बचावकार्य सुरू केले.
जखमींना तातडीने जवळील रुग्णालयात दाखल करण्यात आले असून त्यांच्यावर उपचार सुरू आहेत. काहींची प्रकृती स्थिर असल्याचे समजते. मात्र मृतांचा आकडा वाढण्याची भीती व्यक्त केली जात आहे.
अपघातानंतर नवले पुल परिसरातील वाहतूक काही काळासाठी बंद ठेवण्यात आली होती. आगीवर नियंत्रण मिळवण्यात आले असून सध्या घटनास्थळी पोलिस व अग्निशमन दलाचे पथक मदत आणि बचावकार्य करत आहे.
