पाली (प्रतिनिधी) : रायगड जिल्हा पोलिसांच्या वतीने आदिवासी मुलांमध्ये शिक्षण, करिअर मार्गदर्शन तसेच बालविवाह प्रतिबंध या विषयांवर जनजागृती करण्यासाठी विशेष कार्यशाळेचे आयोजन करण्यात आले आहे. ही कार्यशाळा दि. १४ नोव्हेंबर २०२५ रोजी सकाळी १०.०० ते सायंकाळी ५.०० या वेळेत वावळोली आश्रम शाळा, सिद्धेश्वर, पाली (सुधागड) येथे पार पडणार आहे.
या कार्यशाळेला रायगड जिल्ह्याच्या पोलीस अधीक्षक आँचल दलाल (भा.पो.से.) प्रमुख अतिथी म्हणून उपस्थित राहणार आहेत. तसेच जिल्ह्यातील अनेक मान्यवर अधिकारी व सामाजिक कार्यकर्तेही या कार्यक्रमाला उपस्थित राहून मार्गदर्शन करणार आहेत.
कार्यक्रमाचे आयोजन उपविभागीय पोलीस अधिकारी श्री. प्रसाद गोकुळे (रोहा विभाग, रोहा), पोलीस निरीक्षक हेमलता शेरेकर (पाली पोलीस स्टेशन) आणि पोलीस निरीक्षक सरिता चव्हाण (भरोसा सेल) यांच्या पुढाकाराने करण्यात आले आहे.
या उपक्रमाद्वारे आदिवासी विद्यार्थ्यांमध्ये शिक्षणाचे महत्त्व, योग्य करिअरची दिशा आणि बालविवाहाचे दुष्परिणाम याबाबत जनजागृती करण्यात येणार आहे.
रायगड पोलिसांचा हा समाजहिताचा उपक्रम निश्चितच आदिवासी समाजातील मुलांच्या प्रगतीसाठी प्रेरणादायी ठरणार आहे.
