अलिबाग (प्रतिनिधी): सहयोग व्यापारी नागरी सहकारी पतसंस्था मर्या.अलिबाग या प्रगत, पारदर्शक व सामाजिक बांधिलकी जपणाऱ्या पतसंस्थेने आपल्या रौप्यमहोत्सवी वर्षानिमित्त एक महत्त्वपूर्ण सामाजिक उपक्रम राबवत वात्सल्य ट्रस्टला रु. २५,०००/- देणगी धनादेश प्रदान केला.
बालदिनाच्या औचित्याने आज ही देणगी संचालिका जागृती जितू शिगवण यांच्या हस्ते वात्सल्य ट्रस्टच्या शोभा उदय जोशी व मेहंदळे मॅडम यांना प्रदान करण्यात आली. संस्थेच्या सामाजिक जबाबदारीचा आणि मानवतावादी विचारांचा हा एक सुंदर प्रत्यय होता.
कार्यक्रमास संस्थेचे अध्यक्ष योगेश रामदास मगर,उपाध्यक्ष संजय हरिश्चंद्र पाटील, संचालक सुनिल तांबडकर, निळकंठ केमकर, मोहन वैद्य, तज्ञ संचालक चिंतामणी मकू, संचालिका प्रा.श्रावणी मगर, व्यवस्थापक वैभव बोर्लीकर, तसेच कर्मचारीवर्गातील न.ल.पाटील आदी मान्यवर उपस्थित होते.
सदर देणगी रौप्यमहोत्सवी वर्षासाठी संकलित सामाजिक उपक्रम निधीतून प्रदान करण्यात आली. पतसंस्थेच्या स्थापनेपासून सामाजिक संवेदना, जनहिताचे उपक्रम आणि समुदायाच्या प्रगतीसाठी सतत कार्यरत राहण्याची परंपरा संस्थेने जपली आहे.
अध्यक्ष योगेश मगर यांच्या मार्गदर्शनाखाली संस्था वित्तीय शिस्त, सदस्याभिमुख सेवा,आधुनिक तंत्रज्ञानाची सांगड आणि सामाजिक बांधिलकी अशा चारही आघाड्यांवर उल्लेखनीय कार्य करत आहे.
सहयोग पतसंस्थेची सामाजिक उपक्रमांप्रती असलेली निष्ठा आणि जबाबदारी पुढील काळातही अशीच कायम राहील अशी मोलाची भावना उपस्थित मान्यवरांनी व्यक्त केली.
