अलिबाग (प्रतिनिधी): अलिबाग नगरपरिषद निवडणुकीसाठी महाविकास आघाडीच्या उमेदवारांनी आज दमदार शक्तीप्रदर्शन करत उमेदवारी अर्ज दाखल केले. शेकाप मुख्यालय असलेल्या शेतकरी भवनपासून नगरपरिषद कार्यालयापर्यंत भव्य मिरवणुकीचे आयोजन करण्यात आले. ढोल-ताशांच्या गजरात निघालेल्या या मिरवणुकीत शेकापचे सरचिटणीस जयंत पाटील, काँग्रेस नेते राजाभाऊ ठाकूर, माजी नगराध्यक्ष प्रशांत नाईक, सुप्रिया पाटील तसेच काँग्रेसचे जिल्हा उपाध्यक्ष सुनील थळे यांसह शेकाप व काँग्रेसचे मोठ्या संख्येने कार्यकर्ते सहभागी झाले होते.
महाविकास आघाडीच्या प्रतिनिधींनी निवडणूक निर्णय अधिकारी विक्रम पाटील यांच्याकडे उमेदवारी अर्ज दाखल केले. अलिबागमध्ये शेकाप नगराध्यक्षपदासह नगरसेवक पदाच्या १८ जागा तर काँग्रेस २ जागा लढवणार आहे. या सर्व जागांवर त्यांचा सामना महायुतीच्या उमेदवारांशी होणार असून दोन्ही आघाड्यांमध्ये रंगणार्या या लढतीकडे संपूर्ण तालुक्याचे लक्ष लागले आहे.
उमेदवारी अर्ज दाखल प्रक्रियेदरम्यान दोन्ही पक्षांच्या कार्यकर्त्यांनी उत्साहाचे वातावरण निर्माण केले. निवडणूक प्रचाराची औपचारिक सुरुवात झाल्याने अलिबागमध्ये राजकीय वातावरण अधिक तापण्याची चिन्हे दिसत आहेत.
