अलिबाग (प्रतिनिधी) : आंबेपुर-कुर्डुस जिल्हा परिषद मतदार संघातील पाच ग्रामपंचायत सदस्यांनी रविवारी (दि. १६) शिवसेनेचे जिल्हाप्रमुख राजाभाई केणी यांच्या नेतृत्वाखाली शिवसेनेत प्रवेश करून भाजपाच्या महिला मोर्चाप्रमुख चित्रा पाटील यांना त्यांच्या वाढदिवसाच्या दिवशी मोठा धक्का दिला. भाजपाच्या आंबेपुर-कुर्डुस मतदार संघातील पाच सदस्यांचा पक्षप्रवेश करताना राजाभाई केणी यांनी घराणेशाहीचा सातबारा कोरा करण्याचे आव्हान कार्यकर्त्यांसमोर ठेवले. शिवसेना प्रमुख व राज्याचे उपमुख्यमंत्री एकनाथ शिंदे यांनी रायगड जिल्हा परिषदेस भगवा फडकवण्याचे आदेश दिले असून, त्यानुसार सर्व शिवसैनिकांनी कामाला लागण्याच्या सूचनाही केणी यांनी दिल्या.
या वेळी शिवसेनेच्या आंबेपुर मतदारसंघाच्या अधिकृत उमेदवार रसिकाताई केणी यांनी कार्यकर्त्यांना मार्गदर्शन केले. निवडणुकीस अद्याप काही दिवस असले तरी कार्यकर्त्यांचा उत्साह आणि सर्वसामान्य मतदारांचा प्रतिसाद पाहता विजय निश्चित असल्याचा विश्वास त्यांनी व्यक्त केला. या मतदारसंघातील थांबलेला विकास अधिक गतीमान करण्यासाठी अलिबाग–मुरुडचे आमदार महेंद्र दळवी आणि जिल्हा प्रमुख राजाभाई केणी ठामपणे पाठीशी असल्याने पुढील काळ आपलाच असेल, असेही रसिकाताई केणी यांनी सांगितले. आंबेपुर-कुर्डुस जिल्हा परिषद मतदार संघातील भाजपाच्या ग्रामपंचायत सदस्या मीनाक्षी पाटील, प्रतिक आरिलकर, सिद्धेश हंबीर आणि किरण पाटील यांनी शिवसेना (शिंदे गट) प्रवेश केला. या पक्षप्रवेशाने कुर्डुस मतदार संघातील शिवसेनेची ताकद वाढली आहे, ही ताकद आम्ही शिवसेनेच्या उमेदवार रसिकाताई केणी यांच्या पाठीशी लावण्याचा निर्धार या सदस्यांनी व्यक्त केला. या पक्ष प्रवेशावेळी शैलेश पाटील, मंगेश चंदने, याशीन औसेकर, अमित बैकर, नयन पाटील, हरिश्चंद्र म्हात्रे, राजा पाटील, स्वप्नील म्हात्रे, संकेत पाटील आणि रेश्मा जोशी उपस्थित होते.
मार्गदर्शन करताना राजाभाई केणी यांनी भाजपाच्या कारभारावर टीका केली. भाजपाच्या उमेदवार चित्रा पाटील यांनी या पक्षप्रवेशाचा मोठा धसका घेतला असून, प्रवेश रोखण्यासाठी कार्यकर्त्यांना विविध प्रलोभने दिली जात असल्याचेही त्यांनी सांगितले. शिवसेनेत मोठ्या प्रमाणात पक्षप्रवेश सुरू असून, राष्ट्रवादी–शिवसेना–भाजपा महायुतीची शक्यता सध्या नाही. त्यामुळे पक्षप्रमुखांनी सर्वत्र ताकदीने काम करण्याचे आदेश दिले आहेत. रायगड जिल्हा परिषदेच्या ५९ जागांवर शिवसेना उमेदवार देऊन शिवतीर्थावर भगवा फडकवण्याची तयारी सुरू आहे. “आता नाही तर कधीच नाही” अशी संधी उपलब्ध झाल्याचे सांगत केणी यांनी घराणेशाही संपवण्याचे आवाहन केले. येथे भाजपाच्या नेत्यांनी उद्योगप्रकल्पांना विरोध केला, असेही त्यांनी म्हटले. हा सातबारा कोणाच्याही घराण्याची जहागिरी नसून सर्वसामान्य असून नागरिकांच्या हितासाठी प्रशासन चालले पाहिजे, असा संदेश त्यांनी दिला. शिवसेनेच्या माध्यमातून खारेपाट परिसरात आता मोठ्या उद्योग गुंतवणुकीचे वातावरण तयार झाले असून, त्यामुळे तरुणांना रोजगाराच्या नव्या संधी उपलब्ध होतील, असा आशावादही त्यांनी व्यक्त केला. कुर्डुस परिसरातून नव्याने प्रवेश केलेल्या सदस्यांनी पक्ष नेतृत्वावर विश्वास दाखविल्याबद्दल केणी यांनी त्यांचे मनापासून स्वागत केले. या बैठकीत शिवसेनेचे नेते दिलीप भोईर यांच्या प्रकरणावरही चर्चा झाली. त्यांना जेलमधून लवकर मुक्त करण्यासाठी आमदार महेंद्र दळवी सक्रिय प्रयत्न करत असल्याचे केणी यांनी सांगितले. अलिबाग, रोहा आणि मुरुड तालुक्यात भोईर यांचा मोठा जनाधार असून, आगामी निवडणुकांत त्याचा नक्कीच फायदा होईल, असा विश्वासही त्यांनी व्यक्त केला. कार्यक्रमाचे सुत्रसंचालन जीवन पाटील यांनी केले.
