अलिबाग(प्रतिनिधी): अलिबाग नगरपालिका निवडणुकीत महायुतीच्या उमेदवारांनी अर्ज दाखल करण्यास सुरूवात केली असून अलिबागचा नगराध्यक्षा महायुतीचाच होणार, असा दृढ विश्वास भाजपचे जिल्हा सरचिटणीस ॲड. महेश मोहिते यांनी व्यक्त केला. शनिवारी शेकाप–कॉंग्रेस आघाडीच्या उमेदवारांनी अर्ज दाखल केल्यानंतर महायुतीच्याही उमेदवारांनी आपले अर्ज सादर करण्याची प्रक्रिया गतीने सुरू केली. प्रभाग क्रमांक ७ मधून भाजपाचे शहरप्रमुख ॲड. अंकित बंगेरा यांनी शनिवारीच निवडणूक निर्णय अधिकाऱ्याकडे आपला अर्ज दाखल केला.
महायुतीचे आतापर्यंत १५ उमेदवार अर्ज दाखल करीत असून उर्वरित नगरसेवक पदांचे अर्ज सोमवारी भरले जाणार आहेत. यासोबतच नगराध्यक्षा पदाच्या महायुतीच्या उमेदवार तनुजा पेरेकर यांचाही अर्ज सोमवारी सादर केला जाणार आहे. अलिबाग शहरात महायुतीच्या उमेदवारांना मिळणारा उत्साहवर्धक प्रतिसाद पाहता महायुती शासन स्थापन होईल, असा विश्वास मोहिते यांनी व्यक्त केला. आगामी निवडणुकीत विकासाच्या ध्येयाने एकजूट होऊन काम करणाऱ्या उमेदवारांना मतदार सकारात्मक प्रतिसाद देतील, असेही त्यांनी सांगितले.
