अलिबाग (प्रतिनिधी): अलिबाग नगरपालिका निवडणुकीसाठी शिवसेना–भाजप महायुतीच्या उमेदवारांनी आज वाजतगाजत मिरवणुकीसह आपले उमेदवारी अर्ज दाखल केले. नगराध्यक्षपदासाठी भाजपच्या तनुजा पेरेकर यांनी अर्ज सादर केला असून नगरसेवक पदांसाठीही महायुतीचे उमेदवार मोठ्या उत्साहात अर्ज भरताना दिसले.
अर्ज दाखल करताना अलिबागचे आमदार महेंद्र दळवी, भाजप आमदार विक्रांत पाटील, जिल्हा सरचिटणीस महेश मोहिते, महिला मोर्चाच्या जिल्हाध्यक्षा चित्रा पाटील यांसह अनेक पदाधिकारी उपस्थित होते. आगामी निवडणुकीत महायुतीचा थेट सामना शेकाप–काँग्रेस आघाडीशी होणार आहे.
अलिबागच्या विकासासाठी आपण गेल्या काही वर्षांत मोठ्या प्रमाणावर निधी उपलब्ध करून दिला असून त्याचा लाभ नागरिकांना मिळत आहे. त्यामुळे परिवर्तनासाठी अलिबागकर यंदा महायुतीला साथ देतील, असा विश्वास आमदार महेंद्र दळवी यांनी यावेळी व्यक्त केला. तर आजच्या अर्ज दाखल प्रक्रियेतून अलिबागमध्ये परिवर्तनाचा नवा अध्याय सुरू झाल्याचे आमदार विक्रांत पाटील यांनी सांगितले.
निवडणूक मोसमाची जोरदार सुरुवात होत असताना दोन्ही पक्षा-मोर्चांकडून प्रचाराचा वेग वाढण्याची चिन्हे दिसत असून अलिबागमधील निवडणूक चुरशीची होण्याची शक्यता आहे.
