अलिबाग (प्रतिनिधी): मांडवा जेट्टी ते अलिबाग मार्गावरील वाढत्या वाहतूक कोंडीवर नियंत्रण आणण्यासाठी जिल्हाधिकारी किशन जावळे यांनी जड व अवजड वाहनांच्या वाहतुकीवरील मर्यादा लागू करण्याचे आदेश दिले आहेत. नव्या नियमानुसार दररोज सकाळी ८ ते दुपारी १२ आणि सायंकाळी ४ ते रात्री ८ या वेळेत अवजड वाहनांची वाहतूक बंद राहणार आहे.
या बंदीत दूध, पेट्रोल, डिझेल, स्वयंपाकाचे गॅस, औषधे, ऑक्सिजन, पाणी, भाजीपाला यांसारख्या जीवनावश्यक वस्तू वाहून नेणारी वाहने तसेच पोलीस, फायर ब्रिगेड आणि रुग्णवाहिका यांचा समावेश होणार नाही.
रायगड हा प्रमुख पर्यटन जिल्हा असल्याने अलिबाग, मांडवा, किहीम, आक्षी, नागाव किनारपट्टीवर वर्षभर मोठ्या संख्येने पर्यटक येतात. पर्यटन हंगामात या मार्गांवर मोठी वाहतूक कोंडी निर्माण होत असल्याचे प्रशासनाच्या निदर्शनास आले आहे. त्यातच मांडवा जेट्टीवरील बोट आणि रो-रो सेवेद्वारे मुंबईहून मोठ्या प्रमाणावर वाहने येत असल्याने स्थिती अधिक गंभीर बनते.
अलिबाग–मांडवा मार्ग अरुंद असल्याने वाहतूक कोंडीमुळे वारंवार अपघात होतात. शनिवार-रविवार आणि सार्वजनिक सुट्ट्यांमध्ये पर्यटकांच्या वाहनांच्या लांबच लांब रांगा लागत असल्याने विद्यार्थी, स्थानिक नागरिक व प्रवाशांचा प्रवास वेळ वाढतो. सर्वात गंभीर बाब म्हणजे रुग्णवाहिका तासन्‌तास कोंडीत अडकण्याची शक्यता निर्माण होते, ज्यामुळे रुग्णाच्या जीविताला धोका संभवतो.
या सर्व परिस्थितीचा विचार करून अपघातांची संख्या कमी करण्यासाठी, स्थानिक नागरिक आणि पर्यटकांच्या प्रवासास सुलभता आणण्यासाठी व जीवनावश्यक सेवांची वाहतूक सुरळीत राहावी यासाठी जिल्हाधिकारी किशन जावळे यांनी ही वाहतूकबंदी अधिसूचना जारी केली आहे.
