अलिबाग नगरपालिका निवडणुकीत प्रभाग क्रमांक ६ब मधून सौ. उमा अनिरुद्ध आठवले (पल्लवी) यांनी अपक्ष उमेदवारी अर्ज दाखल करून निवडणूक रिंगणात उतरल्याची घोषणा केली आहे. पक्षीय राजकारणापेक्षा जनतेची कामे आणि स्थानिक विकासाला प्राधान्य देण्याच्या हेतूने त्यांनी पक्षाचा आधार न घेता स्वतंत्र उमेदवार म्हणून निवडणूक लढवण्याचा निर्णय घेतला आहे.
उमा आठवले यांनी प्रभागातील समस्या, आवश्यक सुविधा आणि विकासाची गरज जवळून अनुभवली असून, मतदारांशी थेट संपर्क ठेवत सर्वसमावेशक विकासाचे नियोजन करण्याचा आपला हेतू स्पष्ट केला आहे. कोणत्याही पक्षाच्या दबावाशिवाय निर्भीड निर्णय घेण्याची क्षमता, जनतेपुढे असलेली थेट जबाबदारी आणि कार्यनिष्ठेची बांधिलकी ही त्यांच्या अपक्ष उमेदवारीची प्रमुख वैशिष्ट्ये असल्याचे त्या सांगतात.
विशेषतः स्थानिक पायाभूत सुविधा, पाणीपुरवठा, स्वच्छता, रस्ते विकसित करणे आणि महिलांसाठी तसेच ज्येष्ठ नागरिकांसाठी आवश्यक सुविधा उपलब्ध करून देणे ही त्यांची प्रमुख प्राधान्ये राहतील, असे त्यांनी सांगितले. स्वच्छ प्रतिमा, प्रामाणिकपणा आणि साधेपणा या गुणांमुळे त्यांनी मतदारांचा विश्वास संपादन करण्याचा विश्वास व्यक्त केला आहे.
मतदारांच्या सहकार्याने प्रभाग क्रमांक ६ब ला सक्षम, उत्तरदायी आणि विकासाभिमुख नेतृत्व देण्याचा आपला संकल्प असल्याचे उमा आठवले यांनी सांगितले.
