अलिबाग (प्रतिनिधी): अलिबाग नगरपालिका निवडणुकीत शेकाप–कॉंग्रेस आघाडीने प्रचाराला जोरदार सुरुवात केली आहे. शहराच्या ग्रामदैवत श्री काळंबादेवी मंदिरात नारळ वाढवून व पूजा करून प्रचाराचे विधिवत उद्घाटन करण्यात आले. यानंतर उमेदवार आणि कार्यकर्त्यांनी शहरातील प्रमुख भागांमधून भव्य प्रचार फेरी काढत नागरिकांशी संवाद साधला.
नगराध्यक्ष पदाच्या उमेदवार अक्षया नाईक यांनी यावेळी बोलताना, अलिबागला स्मार्ट सिटीचा दर्जा मिळवून देणे आणि शहराची ओळख जागतिक पातळीवर पोहोचवणे हे आपले प्रमुख ध्येय असल्याचे सांगितले. नागरिकांच्या मूलभूत सुविधांमध्ये सुधारणा, पर्यटनवृद्धी आणि स्वच्छ–सुंदर अलिबाग घडविण्याचा निर्धार त्यांनी व्यक्त केला.
प्रचाराच्या शुभारंभावेळी आघाडीच्या उमेदवारांची ओवाळणी करण्यात आली. कॉंग्रेसचे माजी जिल्हा परिषद सदस्य काका ठाकूर यांच्या हस्ते नारळ फोडून प्रचाराचा प्रारंभ झाला. कार्यक्रमाला कॉंग्रेसचे जिल्हा उपाध्यक्ष सुनील थळे, अलिबागचे माजी नगराध्यक्ष प्रशांत नाईक, नगरसेवक पदाचे सर्व उमेदवार आणि मोठ्या संख्येने कार्यकर्ते उपस्थित होते.
प्रचार फेरीदरम्यान अलिबागकरांनी उमेदवारांना उत्स्फूर्त प्रतिसाद देत आघाडीला भरभरून पाठिंबा दर्शविला.
