अलिबाग(प्रतिनिधी):अलिबाग तालुक्यातील सांबरी येथे धावेश्वर महाराजांच्या मंदिराच्या उभारणीचा मार्ग मोकळा झाला असून मंदिराचे भूमिपूजन अलिबाग–मुरुडचे आमदार महेंद्र दळवी, शिवसेनेचे जिल्हा प्रमुख राजाभाई केणी, जिल्हा परिषद उमेदवार रसिकाताई केणी आदींच्या उपस्थितीत पार पडले. आमदार दळवींनी निवडणुकीपूर्वी दिलेल्या आश्वासनानुसार मंदिर उभारणीची प्रक्रिया वेगाने सुरू झाली असून पुढील वर्षी याच दिवशी मंदिराचे लोकार्पण करण्याचा विश्वास त्यांनी व्यक्त केला. हे मंदिर श्रद्धेचे केंद्र ठरण्यासोबतच परिसराच्या सांस्कृतिक ओळखीला नवी दिशा देईल, असेही ते म्हणाले.
दळवी यांनी कुर्डूस, नागोठणे आणि शहापूर परिसरात सुरू असलेल्या औद्योगिक प्रकल्पांमुळे विकास गती घेत असल्याचे सांगितले. नव्या उद्योगांमुळे स्थानिक तरुणांसाठी रोजगाराच्या संधी वाढत असून या भागाचे औद्योगिक रूपांतर आणखी वेगाने होईल, असा विश्वास त्यांनी व्यक्त केला.
विविध विकासकामांना गती देण्यासाठी राजाभाई केणी व रसिकाताई केणी यांनी मोठे प्रयत्न केल्याचे त्यांनी गौरवले तसेच आंबेपुर मतदारसंघातील रसिका केणी यांना विजयी करण्याचे आवाहनही केले. धावेश्वर मंदिर प्रकल्पामुळे पर्यटन, अर्थव्यवस्था आणि स्थानिक सांस्कृतिक विकासाला चालना मिळेल, अशी अपेक्षा नागरिकांनी व्यक्त केली.
