रायगड(प्रतिनिधी): रायगड पोलीस दलाच्या हद्दीत राष्ट्रीय महामार्गावरील वाढत्या अपघातांच्या पार्श्वभूमीवर 45 ब्लॅक स्पॉटची नोंद झाली आहे. या ठिकाणी वेगमर्यादा मोडणाऱ्या वाहनचालकांवर नियंत्रण ठेवण्यासाठी जिल्हा वाहतूक शाखेतर्फे अत्याधुनिक स्पीड गनचा वापर सुरू करण्यात आला आहे. रडार आणि सेंसर प्रणालीसह सज्ज असलेली ही स्पीड गन वाहनांचा वेग, क्रमांक तसेच संबंधित माहिती काही क्षणांत नोंदवते. त्यामुळे नियमभंग करणाऱ्यांवर तत्काळ कारवाई करणे शक्य होणार आहे.
या यंत्रणेच्या मदतीने पोलीस दलाला ब्लॅक स्पॉटवरील वाहतुकीवर बारकाईने लक्ष ठेवता येणार असून अपघाताचे प्रमाण कमी करण्यास मोठी मदत होणार आहे. वाहनांची संपूर्ण माहिती एका क्लिकवर उपलब्ध होत असल्याने तपासाची गती वाढेल, असे जिल्हा वाहतूक शाखेचे पोलीस निरीक्षक अभिजीत भुजबळ यांनी सांगितले.
