अलिबाग (प्रतिनिधी) : शिवसेना पक्षाचे उद्योगमंत्री व रायगडचे माजी पालकमंत्री उदय सामंत यांच्या प्रमुख उपस्थितीत, तसेच आमदार महेंद्रशेठ दळवी यांच्या नेतृत्वाखाली अलिबाग येथे शिवसेना–भाजप युतीची नगरपालिका निवडणुकीच्या तयारीसंदर्भातील आढावा बैठक पार पडली. रायगड जिल्ह्यातील निवडणुका विश्वासाच्या बळावर लढवल्या जात असल्याने युतीचे सर्व उमेदवार विजयी होतील, असा विश्वास सामंत यांनी व्यक्त केला. उपमुख्यमंत्री व नगरविकास मंत्री एकनाथ शिंदे यांच्या नेतृत्वामुळे विकासकामांसाठी निधी कमी पडणार नाही, अशी ग्वाहीही त्यांनी दिली.
आमदार दळवी यांनी मतदारसंघात झालेल्या विकासकामांचा उल्लेख करत उमेदवारांची विजय शक्यता मजबूत असल्याचे सांगितले. येणाऱ्या पाच वर्षांत विकासकामांच्या जोरावर मत मागण्याची वेळ येणार नाही, असा विश्वास त्यांनी व्यक्त केला. यावेळी त्यांच्या समवेत आमदार महेंद्रशेठ दळवी, जिल्हा परिषदेचे माजी उपाध्यक्ष आस्वाद पाटील, माजी समाजकल्याण सभापती दिलीप भोईर, शिवसेना जिल्हाप्रमुख राजा केणी, भाजप महिला जिल्हाध्यक्षा चित्रा पाटील, शिवसेना महिला आघाडी जिल्हा संघटिका संजीवनी नाईक, भाजप जिल्हा चिटणीस ॲड. महेश मोहिते, युतीच्या नगराध्यक्ष पदाच्या उमेदवार तनुजा पेरेकर यांच्यासह युतीचे सर्व उमेदवार, पदाधिकारी, कार्यकर्ते उपस्थित होते.
