एस.एस.सी. बोर्ड परीक्षा पूर्व मार्गदर्शन शिबिर वाडगाव येथे उत्साहात पार


अलिबाग (प्रतिनिधी): ग्रुप ग्रामपंचायत वाडगांव आणि बापदेव सामाजिक सेवाभावी संस्था यांच्या संयुक्त विद्यमाने आयोजित एस.एस.सी. (इ. 10 वी) बोर्ड परीक्षा पूर्व मार्गदर्शन शिबिर–2025 वाडगाव येथे उत्साहात पार पडले. हे शिबिर रविवार, 23 नोव्हेंबर 2025 रोजी सकाळी 8.30 या वेळेत रा. जि. प. शाळा, वाडगांव येथे घेण्यात आले.
शिबिरामध्ये विविध विषयांतील तज्ञ शिक्षकांनी विद्यार्थ्यांना अभ्यासाची प्रभावी पद्धत, प्रश्नपत्रिकेची बांधणी, वेळेचे नियोजन तसेच गुणांमध्ये वाढीच्या रणनीती याबाबत सविस्तर मार्गदर्शन केले. विशेष मार्गदर्शन के. डी. पाटील सरांनी देऊन विद्यार्थ्यांमध्ये आत्मविश्वास निर्माण केला.
या उपक्रमामुळे विद्यार्थ्यांना येणाऱ्या बोर्ड परीक्षेसाठी अधिक सक्षम तयारी करता आली. मार्गदर्शक शिक्षक आणि विद्यार्थ्यांचे आयोजकांच्या वतीने हार्दिक स्वागत करण्यात आले. कार्यक्रम यशस्वीपणे पार पाडण्यासाठी सहकार्य करणाऱ्या संस्थेच्या पदाधिकाऱ्यांचे व वाडगावचे उपसरपंच जयेंद भगत यांचे मनःपूर्वक आभार मानण्यात आले.