रायगड (प्रतिनिधी): राजकारणात संधी मिळेल तिथं आपल्या कुटुंबातील व्यक्तीला उमेदवारी देण्याची परंपरा गेली अनेक वर्षे सुरू आहे. अगदी ग्रामपंचायत निवडणुकीपासून जिल्हा परिषद, आमदारकी, खासदारकीच्या निवडणुकीत प्रथम प्राधान्य पुढाऱ्यांच्या घरातील उमेदवाराला दिलं जातं. नगरपालिका निवडणूक देखील त्याला अपवाद नाही. यावेळी रायगड जिल्ह्यात देखील नगरपालिका निवडणुकीत लेकीसुनांचा बोलबाला पहायला मिळतो.
रायगडचे राजकारण नेहमीच चर्चेत राहिले असून सध्या येथे शिंदे गटाची शिवसेना आणि राष्ट्रवादी काँग्रेसमधील वादामुळे राजकीय वातावरण तापले आहे. पालकमंत्रीपदाच्या वादापासून सुरू झालेली चर्चा आता पदाधिकारी आणि कार्यकर्त्यांच्या पक्षांतरांपर्यंत पोहोचली आहे. त्यामुळे रायगडातील घडामोडी राज्यभर चर्चेचा विषय ठरत आहेत.
दरम्यान, रायगड जिल्ह्यातील दहा नगरपालिका आणि नगरपंचायतींच्या निवडणुका जाहीर झाल्यानंतर अनेक नेत्यांनी आपल्या वारसांना राजकीय पटलावर उतरवण्याची संधी साधली आहे. यावेळी विशेष म्हणजे दोन लेकी आणि दोन सुना अशी चार तरुणी सरळ राजकीय मैदानात उतरल्या असून त्यांच्याकडे संपूर्ण जिल्ह्याचे लक्ष लागले आहे.
अलिबागमध्ये माजी नगराध्यक्ष प्रशांत नाईक यांची कन्या अक्षया नाईक तर मुरुडमध्ये माजी नगराध्यक्ष मंगेश दांडेकर यांची कन्या आराधना नाईक निवडणूक रिंगणात उतरल्या आहेत. पेणमध्ये आमदार रवींद्र पाटील यांच्या सुने प्रीतम पाटील यांच्यावर प्रचाराची धुरा आहे, तर कर्जत येथे माजी आमदार सुरेश लाड यांच्या सुने डो. स्वाती पाटील यांनी निवडणुकीची तयारी सुरू केली आहे.
या चारही उमेदवारांनी आपल्या आपल्या शहरांमध्ये जोरदार प्रचाराचा शुभारंभ केला असून स्थानिक पातळीवर उत्सुकता वाढली आहे. परिवाराचा राजकीय वारसा पुढे नेणाऱ्या या नव्या चेहऱ्यांपैकी कोण बाजी मारणार, कोण मतदारांना आकर्षित करणार आणि कोण पुढील स्थानिक नेतृत्व बनेल, याकडे आता रायगडसह संपूर्ण राज्याचे लक्ष लागले आहे.
