सांगली : टीम इंडियाची स्टार क्रिकेटपटू स्मृती मानधना आणि संगीतकार पलाश मुच्छल यांचा विवाहसोहळा आज (२३ नोव्हेंबर) दुपारी ३.३० वाजता समडोळी (सांगली) येथील मानधना फार्महाऊसमध्ये पार पडणार होता. मात्र समारंभास काही तास आधीच स्मृतीच्या वडिलांची प्रकृती अचानक बिघडल्याने त्यांना तातडीने रुग्णालयात दाखल करण्यात आले. त्यामुळे विवाहसोहळा पुढे ढकलण्यात आल्याची माहिती कुटुंबीयांनी दिली आहे.
वडिलांची प्रकृती सध्या स्थिर असून पुढील काही तास निरीक्षणाखाली ठेवून उपचार सुरू ठेवण्याची गरज असल्याचे वैद्यकीय सूत्रांनी सांगितले. कुटुंबाकडून ‘परिस्थिती नियंत्रणात आल्यानंतर नव्या तारखेची घोषणा करण्यात येईल,’ असे कळविण्यात आले आहे.
दरम्यान, लग्नापूर्वीचे सर्व विधी शुक्रवारपासून सुरू झाले होते. हळद, मेहंदी आणि संगीत समारंभ उत्साहात पार पडले होते. या कार्यक्रमांचे फोटो व व्हिडिओ सोशल मीडियावर मोठ्या प्रमाणात व्हायरल झाले होते आणि चाहत्यांमध्ये लग्नसोहळ्याबद्दल उत्सुकता वाढली होती.
मात्र आज सकाळी नाश्त्यावेळी स्मृतीच्या वडिलांची तब्येत बिघडताच कुटुंबीय व विवाहसोहळ्याच्या तयारीतील सदस्यांनी त्यांना तातडीने रुग्णालयात हलविले. समडोळी येथील फार्महाऊसमध्ये सजवलेला मंडप, डेकोरेशन आणि पाहुण्यांची व्यवस्था पूर्ण झाली होती, मात्र परिस्थिती पाहता सर्व तयारी स्थगित करून सजावट उचलण्यास सुरुवात करण्यात आली.
सध्या दोन्ही कुटुंबातील सदस्य व आयोजन समिती रुग्णालयात उपस्थित असून पुढील कार्यक्रमाविषयीचा निर्णय लवकरच घेतला जाणार असल्याची माहिती सूत्रांनी दिली.
