खोपोली (दत्तात्रेय शेडगे): मुंबई–पुणे जुन्या महामार्गावरील बोरघाटात सोमवार दुपारी झालेल्या भीषण अपघातात एका स्विफ्ट कारने समोरील टेम्पोला जोरदार धडक दिली. धडकेनंतर कारला अचानक आग लागल्याने काही काळ परिसरात भीतीचे वातावरण निर्माण झाले. सुदैवाने कारमधील कुटुंबीयांनी तत्काळ बाहेर पडत जीव वाचवला. या दुर्घटनेत दोन जण किरकोळ जखमी झाले असून मोठी जीवितहानी टळली आहे.
मिळालेल्या माहितीनुसार, औटी कुटुंब स्विफ्ट कार (MH 43 CP 2409) घेऊन आळेफाटा येथून घणसोलीकडे जात होते. वाहन बोरघाटातील नवीन पोलीस चौकीजवळील अवघड वळणावर पोहोचताच चालकाचे कारवरील नियंत्रण सुटले आणि कारने समोरील टेम्पोला प्रचंड धडक दिली. धडकेनंतर कारमध्ये शॉर्टसर्किट होऊन काही क्षणांतच कार पेटली.
घटनेच्या वेळी कारमधून कुटुंबीयांनी तत्काळ बाहेर पडत योग्य वेळी जीव वाचवला. दोन जण किरकोळ जखमी झाले असून त्यांना प्राथमिक उपचार देण्यात आले आहेत.
अपघाताची माहिती मिळताच खोपोली पोलिस, महामार्ग वाहतूक पोलिस, आयआरबी पेट्रोलिंग टीम, डेल्टा फोर्स आणि हेल्प फाउंडेशनचे सदस्य तात्काळ घटनास्थळी दाखल झाले. खोपोली अग्निशमन दलाने आग विझवण्यासाठी शर्थीचे प्रयत्न केले आणि काही वेळातच आग आटोक्यात आणण्यात यश मिळाले. दरम्यान, अपघातग्रस्त कार रस्त्याच्या बाजूला हटवून वाहतूक सुरळीत करण्यात आली.
या अपघातामुळे काही काळ महामार्गावरील वाहतूक विस्कळीत झाली होती. पोलिसांनी पुढील तपास सुरू केला आहे.
