खोपोली (दत्तात्रेय शेडगे): मुंबई–पुणे एक्सप्रेसवेवर आज पहाटे झालेल्या भीषण अपघातात एका कंटेनरने समोरून जाणाऱ्या पिकअप, ट्रक आणि कारला जोरदार धडक दिली. या भीषण अपघातात कंटेनर चालकाचा जागीच मृत्यू झाला असून पिकअपमधील दोनजण जखमी झाले आहेत.
घटनेची प्राथमिक माहिती अशी की, कंटेनर (क्रमांक MH 46 AF 0084) हा रियाज अहमद (वय 36, रा. अपॉट हिल, मुंबई) यांच्या ताब्यात मुंबईकडून पुण्याकडे जात होता. बोरघाटातील आडोशी येथील नवीन बोगद्याजवळ येताच कंटेनरवरील चालकाचे नियंत्रण सुटले. यामुळे कंटेनरने समोरील पिकअप (MH 06 BW 6391) ला मागून जोरदार धडक दिली. पिकअप पुढे ढकलली जाऊन त्याने समोरील ट्रकला (MH 09 EM 9954) धडक दिली, तसेच ट्रकने त्याच्या पुढील टाटा पंच कारला (MH 03 BF 6303) जोरदार धडक दिली. अशा प्रकारे चार वाहनांचा साखळी अपघात झाला.
धडकेचा जोर इतका प्रचंड होता की कंटेनरची केबिन पूर्णतः चिरडली गेली. यात चालक रियाज अहमद हे केबिनमध्ये अडकून जागीच ठार झाले. पिकअपमधील चालक व प्रवासी अशा दोघांना गंभीर जखमी अवस्थेत बाहेर काढून तात्काळ रुग्णालयात दाखल करण्यात आले आहे.
या अपघातात चारही वाहनांचे मोठ्या प्रमाणात नुकसान झाले आहे.
अपघाताची माहिती मिळताच बोरघाट महामार्ग पोलीस, हेल्प फाउंडेशनचे स्वयंसेवक, आयआरबी पथक, खोपोली पोलिस स्टेशनची टीम, देवदूत यंत्रणा, डेल्टा फोर्स, महाराष्ट्र सुरक्षा बल यांसह विविध आपत्कालीन पथके तात्काळ घटनास्थळी दाखल झाली. अडकलेल्या चालकांना बाहेर काढण्याची आणि वाहतुकीची व्यवस्था सुरळीत करण्याची कार्यवाही तातडीने करण्यात आली.
