खोपोली (दिनकर भुजबळ): खोपोली नगरपरिषद निवडणूक २०२५ च्या पार्श्वभूमीवर कायदा-सुव्यवस्था अबाधित ठेवण्यासाठी रायगड पोलीस प्रशासनाने व्यापक व बहुपदरी तयारीला गती दिली आहे. शांततामय, पारदर्शक आणि गैरप्रकारमुक्त निवडणूक पार पाडण्यासाठी कडक उपाययोजना करत पोलिसांनी शहरात सज्जतेचा नवा मापदंड निर्माण केला आहे.
जिल्हा पोलीस अधीक्षक श्रीमती आंचल दलाल यांच्या मार्गदर्शनाखाली खालापूर उपविभागीय पोलीस अधिकारी डॉ. विशाल नेहुल आणि खोपोली पोलीस ठाण्याचे प्रभारी पोलीस निरीक्षक सचिन हिरे यांनी सर्व प्रभागांमध्ये भ्रमण करून सुरक्षा व्यवस्थेची सखोल पाहणी केली. मतदानाच्या आधी शहरातील प्रत्येक घटकाची तपशीलवार छाननी करत त्यांनी निवडणूक यंत्रणेला अधिक गतिमान केले.
पाहणीदरम्यान डॉ. नेहुल यांनी कायदा व सुव्यवस्था बिघडविण्याचा प्रयत्न करणाऱ्यांविरुद्ध तात्काळ आणि कठोर कारवाई करण्याचे स्पष्ट निर्देश दिले.
“निवडणूक प्रक्रिया दबावमुक्त, निर्भय आणि निष्पक्ष ठेवणे ही पोलिसांची प्राथमिक जबाबदारी आहे. कोणत्याही प्रकारची गैरवर्तणूक सहन केली जाणार नाही,” असा ठाम इशारा त्यांनी दिला. वाढीव गस्त, संशयितांवर सतत नजर व विशेष दक्षता याबाबतच्या सूचनाही त्यांनी अधिकाऱ्यांना देण्यात आल्या.
२ डिसेंबर २०२५ रोजी होणाऱ्या मतदानाच्या अनुषंगाने सर्व मतदान केंद्रांची संरचना, सीसीटीव्ही नियंत्रण, पोलिस बंदोबस्त, वाहतूक व्यवस्थापन आणि ईव्हीएम सुरक्षेचा व्यापक आढावा घेत त्रुटी तातडीने दूर करण्याचे निर्देश दिले. निवडणुकीपूर्व आणि निवडणुकीनंतर ईव्हीएम मशीनची सुरक्षा ही सर्वोच्च प्राधान्याने पाहण्याची ताकीदही त्यांनी दिली.
डॉ. नेहुल यांच्या सूचनांनुसार खोपोली पोलिसांनी दंगा काबू योजना राबवून तसेच रूट मार्च काढत शहरात सुरक्षेचा मजबूत पट्टा उभा केला आहे. या उपक्रमांमुळे नागरिकांना सुरक्षिततेची जाणीव आणि निवडणुकीतील पारदर्शकतेचा विश्वास अधिक दृढ झाला आहे.
पोलिस प्रशासनाने स्पष्ट संदेश दिला आहे—
या निवडणुकीत कोणालाही गैरप्रकार करण्याची संधी मिळणार नाही; खोपोली सज्ज आहे, सतर्क आहे, आणि सुरक्षित आहे.
