अलिबाग(प्रतिनिधी): अलिबाग तालुक्यातील रस्त्यांच्या गंभीर दुरवस्थेबाबत माजी आमदार पंडित पाटील यांनी सरकारला घरचा आहेर देत तात्काळ कारवाईची मागणी केली आहे. तालुक्यातील अनेक प्रमुख रस्त्यांवर मोठमोठे खड्डे पडल्याने नागरिकांना दररोज हाल सहन करावे लागत आहेत. विशेषत: कारलेखिंड ते कनकेश्वर या मार्गावरील रस्त्यांची स्थिती अतिशय वाईट असून ठिकठिकाणी खोल खड्डे आणि अर्धवट कामांमुळे वाहतूक धोकादायक झाली आहे.
माजी आमदार पाटील यांनी सांगितले की, महाराष्ट्र राज्य रस्ते विकास महामंडळ (एमएसआरडीसी) आणि मुंबई महानगर क्षेत्रीय विकास प्राधिकरण (एमएमआरडीए) यांच्या अखत्यारीत असलेल्या या रस्त्यांकडे सार्वजनिक बांधकाम विभागाचे दुर्लक्ष होत आहे. विभागांमधील जबाबदारीच्या गोंधळाचा फटका सामान्य नागरिकांना बसत असून रुग्णवाहिका, शालेय बसेस तसेच दैनंदिन प्रवास करणारे सर्वच जण मोठ्या अडचणींना सामोरे जात आहेत.
लोकप्रतिनिधी आणि प्रशासनाचे दुर्लक्ष पाहून पाटील यांनी मंत्री तसेच रायगड जिल्हाधिकाऱ्यांनी तत्काळ हस्तक्षेप करून रस्त्यांची दुरुस्ती पूर्ण करावी, अशी जोरदार मागणी केली आहे. नागरिकांचा वाढता त्रास आणि दिवसेंदिवस बिघडणारी वाहतूक व्यवस्था पाहता रस्त्यांचे काम तातडीने हाती घेणे अत्यावश्यक असल्याचे त्यांनी नमूद केले.
