अलिबाग(प्रतिनिधी): राष्ट्रीय केमिकल्स अँड फर्टिलायझर्स लिमिटेड (RCF) थळ युनिटमध्ये संविधान दिन उत्साहपूर्ण आणि गौरवशाली वातावरणात साजरा करण्यात आला. या कार्यक्रमाला थळ युनिटमधील अधिकारी व कर्मचारी मोठ्या संख्येने उपस्थित होते.
या विशेष प्रसंगी कार्यकारी संचालक (थळ) श्री. नितीन हिरडे यांच्या हस्ते प्रशासकीय इमारतीच्या प्रवेशद्वाराजवळ भारतीय संविधानाच्या प्रस्तावनेचा शिलालेख अनावरण करण्यात आला. RCF एससी-एसटी एम्प्लॉईज वेल्फेअर असोसिएशनच्या पुढाकारातून हा शिलालेख स्थापित करण्यात आला आहे. संविधानातील मूल्यांची जपणूक आणि त्यांची जाण पुढील पिढ्यांपर्यंत पोहोचावी, हा संदेश यावेळी देण्यात आला.
यानंतर भारतीय संविधानाच्या प्रस्तावनेचे सामूहिक वाचन करण्यात आले. उपस्थित कर्मचारी व अधिकाऱ्यांनी न्याय, स्वातंत्र्य, समता आणि बंधुता या संविधानिक मूल्यांचे निष्ठापूर्वक पालन करण्याची शपथ घेतली.
कार्यक्रमाच्या पुढील सत्रात श्री. हर्षवर्धन वाघमारे यांनी ‘संविधानाचे महत्त्व’ या विषयावर प्रेरणादायी व्याख्यान दिले. त्यांनी संविधानाच्या निर्मितीपासून भारतीय लोकशाहीच्या वर्तमानपर्यंतचा प्रवास, तसेच मूलभूत अधिकार व कर्तव्यांचे महत्त्व स्पष्ट केले. कार्यक्रमाचे प्रास्ताविक श्री. सुधीर पेदोर यांनी केले.
आरसीएफ थळ युनिटमध्ये साजऱ्या करण्यात आलेल्या संविधान दिनाने भारतीय लोकशाहीच्या मूलभूत तत्त्वांना आणि संविधानिक मूल्यांना पुन्हा एकदा अधोरेखित करत सर्वांनी त्यांना मानाचा मुजरा अर्पण केला.
