अलिबाग (प्रतिनिधी): रायगड जिल्ह्यातील नवखार, सुडकोली ( ओंकार क्रीडा मंडळ, वेश्वीची खेळाडू) येथील प्रतिभावान आणि आश्वासक कबड्डीपटू कु. पूर्वा राजेंद्र भगत हिच्या अकस्मात निधनाची बातमी समजताच संपूर्ण क्रीडा जगत हादरले. एक उज्वल भविष्य, उगवता तारा आणि कबड्डी क्षेत्रात मोठं नाव कमावण्याची क्षमता असलेली ही कन्या अचानक आपल्यातून निघून गेल्याची वेदना शब्दात मांडणे कठीण आहे.
पूर्वा ही केवळ एक उत्कृष्ट खेळाडू नव्हती, तर कठोर परिश्रम, शिस्त, निष्ठा आणि जिद्दीचं प्रतीक होती. तिची मैदानावरील चपळाई, अचूक खेळ कौशल्य आणि संघासाठी झटणारी वृत्ती अनेक तरुण खेळाडूंना प्रेरणा देणारी होती. तिच्या कामगिरीतून भविष्यातील मोठी स्वप्नं दिसत होती; परंतु नियतीच्या अनपेक्षित वळणावर तिचा प्रवास थांबला ही अत्यंत दुःखद बाब आहे.
तिच्या अचानक निधनाने रायगड जिल्ह्यासह संपूर्ण कबड्डी विश्वावर शोककळा पसरली आहे. तिच्या आठवणी, तिचा दमदार खेळ आणि तिची निष्ठा पुढील पिढ्यांसाठी प्रेरणादायी ठरेल.
कु. पूर्वा राजेंद्र भगत हिला भावपूर्ण श्रद्धांजली. परमेश्वर तिच्या कुटुंबीयांना आणि जवळच्या व्यक्तींना हे अपरिमित दुःख सहन करण्याची शक्ती देवो.
