अलिबाग (प्रतिनिधी): कोकण एज्युकेशन सोसायटीच्या नारायण नागू पाटील शैक्षणिक संकुल, पोयनाड येथील वार्षिक स्नेहसंमेलनाचा भव्य शुभारंभ दिनांक 26 नोव्हेंबर रोजी सायंकाळी 4 वाजता माजी आमदार पंडितशेठ पाटील यांच्या शुभहस्ते संपन्न झाला. उद्घाटन प्रसंगी त्यांनी विद्यार्थ्यांच्या सर्वांगीण विकासासाठी अशा उपक्रमांचे महत्त्व अधोरेखित करत संस्थेच्या कार्याचे कौतुक केले.
कार्यक्रमास माजी जिल्हा परिषद सदस्य चित्रा पाटील, पिरोजबाई बारिया प्राथमिक शाळेच्या मुख्याध्यापिका श्रीमती संगीता माने, इंग्रजी माध्यमाच्या मुख्याध्यापिका प्रिया गायकवाड, ना. ना. पाटील हायस्कूलचे मुख्याध्यापक श्री. शशिकांत पाटील तसेच महिला महाविद्यालयाचे प्राचार्य श्री. अनिल बांगर उपस्थित होते. सर्व मान्यवरांनी विद्यार्थ्यांच्या शैक्षणिक, सांस्कृतिक आणि क्रीडा कामगिरीचे कौतुक करत त्यांना भविष्यासाठी शुभेच्छा दिल्या.
संपूर्ण स्नेहसंमेलनात शिक्षक, शिक्षकेतर कर्मचारी, विद्यार्थी आणि पालकवर्गाने उत्स्फूर्त सहभाग नोंदविला. विविध सांस्कृतिक कार्यक्रम, नृत्य-नाट्य सादरीकरणे, विज्ञान प्रदर्शने, क्रीडा स्पर्धांचे पारितोषिक वितरण यामुळे परिसरात उत्साहाचे वातावरण निर्माण झाले. विद्यार्थ्यांनी सादर केलेल्या कलाप्रदर्शनांना उपस्थितांकडून भरभरून दाद मिळाली.
संस्थेच्या संयुक्त प्रयत्नातून आयोजित केलेले हे स्नेहसंमेलन विद्यार्थ्यांच्या प्रतिभेला व्यासपीठ उपलब्ध करून देणारे ठरले. कार्यक्रमाचे सुयोग्य नियोजन व उत्कृष्ट आयोजनेबद्दल पालकांनी समाधान व्यक्त केले.
